ನವದೆಹಲಿ: 2024 ವಿಶ್ವ ವಾಯು ಗುಣಮಟ್ಟ ವರದಿ (World Air Quality Report) ಪ್ರಕಾರ, ಭಾರತವು ವಿಶ್ವದ 5ನೇ ಅತಿ ಹೆಚ್ಚು ವಾಯು ಮಾಲಿನ್ಯಗೊಂಡ ದೇಶ ಎಂದು IQAir ಸಂಸ್ಥೆ ಬಿಡುಗಡೆ ಮಾಡಿದ ಇತ್ತೀಚಿನ ಮಾಹಿತಿಯು ಬಹಿರಂಗಪಡಿಸಿದೆ. ಈ ವರದಿ 134 ದೇಶಗಳವಾಯು ಗುಣಮಟ್ಟಗಳನ್ನು ವಿಶ್ಲೇಷಿಸಿದ್ದು, ಭಾರತದಲ್ಲಿ ವಾಯು ಮಾಲಿನ್ಯ ಗಂಭೀರ ಸ್ವರೂಪದಲ್ಲಿದೆ ಎಂದು ದೃಢಪಡಿಸಿದೆ.
ಭಾರತದ ವಾಯು ಗುಣಮಟ್ಟವು ಸರಾಸರಿ 54.4 µg/m³ ಇದ್ದು, ಇದು ವಿಶ್ವ ಆರೋಗ್ಯ ಸಂಸ್ಥೆ (WHO) ಶಿಫಾರಸು ಮಾಡಿದ 5 µg/m³ ಸುರಕ್ಷಿತ ಮಟ್ಟವನ್ನು ಬಹಳಷ್ಟು ಮೀರಿಸಿದೆ.
ದೆಹಲಿ: ವಿಶ್ವದ ಅತಿ ಹೆಚ್ಚು ಮಾಲಿನ್ಯಗೊಂಡ ರಾಜಧಾನಿ
ಈ ವರದಿ ಪ್ರಕಾರ, ಕಳೆದ 4 ವರ್ಷಗಳಿಂದಲೂ ದೆಹಲಿ ವಿಶ್ವದ ಅತಿ ಹೆಚ್ಚು ವಾಯು ಮಾಲಿನ್ಯಗೊಂಡ ರಾಜಧಾನಿ ಎನಿಸಿಕೊಂಡಿದೆ. ಇಲ್ಲಿನ ಸರಾಸರಿ ವಾಯು ಗುಣಮಟ್ಟ 92.7 µg/m³ ಆಗಿದ್ದು, WHO ಶಿಫಾರಸು ಮಾಡಿದ ಸುರಕ್ಷಿತ ಮಟ್ಟಕ್ಕಿಂತ 18 ಪಟ್ಟು ಹೆಚ್ಚು. ಗಾಜಿಯಾಬಾದ್, ನೋಯ್ಡಾ, ಫರೀದಾಬಾದ್ ಸೇರಿ ಹಲವಾರು ಭಾರತೀಯ ನಗರಗಳು ಜಾಗತಿಕವಾಗಿ ಅತಿ ಹೆಚ್ಚು ಮಾಲಿನ್ಯಗೊಂಡ ಪಟ್ಟಣಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿವೆ.
2024ರ ವಿಶ್ಲೇಷಣೆ ಪ್ರಕಾರ ಭಾರತವು ವಿಶ್ವದ 5ನೇ ಅತಿ ಹೆಚ್ಚು ಮಾಲಿನ್ಯಗೊಂಡ ದೇಶವಾಗಿದೆ. ಬಾಂಗ್ಲಾದೇಶ, ಪಾಕಿಸ್ತಾನ, ಮಂಗೋಲಿಯಾ ಮತ್ತು ಅಫ್ಘಾನಿಸ್ತಾನ ಈ ಪಟ್ಟಿಯಲ್ಲಿ ಭಾರತಕ್ಕಿಂತಲೂ ಮುಂಚೂಣಿಯಲ್ಲಿವೆ.
- ಜಾಗತಿಕ ಮಟ್ಟದಲ್ಲಿ ಅತಿ ಹೆಚ್ಚು ಮಾಲಿನ್ಯಗೊಂಡ 20 ನಗರಗಳಲ್ಲಿ ಭಾರತದ 14 ನಗರಗಳು ಇವೆ.
- ರಾಜಸ್ಥಾನದ ಭೀವಾಡಿ ಅತಿ ಹೆಚ್ಚು ಮಾಲಿನ್ಯಗೊಂಡ ನಗರವಾಗಿದೆ.
- ವಾಹನಗಳ ಹೊಗೆ, ಕೈಗಾರಿಕಾ ಹೊಗೆ ಪ್ರಮುಖ ಮಾಲಿನ್ಯ ಕಾರಣಗಳಾಗಿವೆ.
ಸರಕಾರದ ಪ್ರತಿಕ್ರಿಯೆ ಮತ್ತು ಕ್ರಮಗಳು
ಭಾರತ ಸರಕಾರವು ವಾಯು ಮಾಲಿನ್ಯ ನಿಯಂತ್ರಣಕ್ಕೆ ರಾಷ್ಟ್ರೀಯ ಸ್ವಚ್ಛ ವಾಯು ಯೋಜನೆ (NCAP) ಜಾರಿ ಮಾಡಿದ್ದು, 2026 ರೊಳಗೆ ದೇಶದ ವಾಯು ಗುಣಮಟ್ಟವನ್ನು 40% ಸುದಾರಿಸುವ ಗುರಿಯನ್ನು ಇಟ್ಟುಕೊಂಡಿದೆ. ಇದರಡಿ ವಾಹನ ಹೊಗೆ ನಿಯಂತ್ರಣ, ವಿದ್ಯುತ್ ವಾಹನಗಳ ಪ್ರಚಾರ, ಕೈಗಾರಿಕಾ ಹೊಗೆ ತಡೆಯಲು ಕಟ್ಟುನಿಟ್ಟಿನ ನಿಯಮಗಳ ಜಾರಿ ಮಾಡಲಾಗಿದೆ.
ಆರೋಗ್ಯದ ಮೇಲೆ ಪರಿಣಾಮ ಮತ್ತು ಜನಜಾಗೃತಿ
ತಜ್ಞರ ಪ್ರಕಾರ, ಹೆಚ್ಚು ಮಲಿನವಾದ ವಾತಾವರಣದಲ್ಲಿ ನಾವು ಇದ್ದರೆ, ನಮಗೆ ಉಸಿರಾಟದ ತೊಂದರೆ, ಹೃದಯ ಸಂಬಂಧಿ ಕಾಯಿಲೆಗಳು, ಮತ್ತು ಆಯುಷ್ಯ ಕಡಿಮೆಯಾಗುವ ಅಪಾಯವಿದೆ. N95 ಮಾಸ್ಕ್ ಧರಿಸುವುದು, ಗಾಳಿ ಶುದ್ಧಿಕರಣ ಯಂತ್ರಗಳ ಬಳಕೆ, ಬಹಳ ಅವಶ್ಯಕವಲ್ಲದ ಹೊರಗಿನ ಚಟುವಟಿಕೆಗಳನ್ನು ಕಡಿಮೆ ಮಾಡುವುದು ಉತ್ತಮ ಎಂದು ತಜ್ಞರು ಸಲಹೆ ನೀಡಿದ್ದಾರೆ.
ಭಾರತದಲ್ಲಿ ವಾಯು ಮಾಲಿನ್ಯ ನಿಯಂತ್ರಣಕ್ಕಾಗಿ ನಿರಂತರ ಪ್ರಯತ್ನಗಳು ನಡೆಯುತ್ತಿದ್ದರೂ, ತಜ್ಞರು ಹೆಚ್ಚು ಪರಿಣಾಮಕಾರಿಯಾದ ನೀತಿಗಳು, ಸಮರ್ಪಕ ಅನುಷ್ಠಾನ, ಮತ್ತು ಸಾರ್ವಜನಿಕ ಸಹಭಾಗಿತ್ವ ಅಗತ್ಯವೆಂದು ಒತ್ತಿಹೇಳುತ್ತಿದ್ದಾರೆ. ಈ ವರದಿ ವಾಯು ಮಾಲಿನ್ಯವನ್ನು ತಡೆಗಟ್ಟಲು ತಕ್ಷಣದ ಕ್ರಮ ಕೈಗೊಳ್ಳಬೇಕೆಂಬ ಎಚ್ಚರಿಕೆಯ ಗಂಟೆ ಎಂದು ಪರಿಗಣಿಸಲಾಗಿದೆ.
