ನವದೆಹಲಿ: ದೇಶದ ಹೆಸರಾಂತ ಮಸಾಲೆ ತಯಾರಿಕಾ ಸಂಸ್ಥೆಗಳಾದ ಎವೆರೆಸ್ಟ್ ಮತ್ತು ಲಾಲ್ಜೀ ಗೋಧೂ ತಯಾರಿಸುವ ಇಂಗು (Hing/Asafoetida) ಉತ್ಪನ್ನಗಳ ಮೇಲೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ತಕ್ಷಣದಿಂದ ಜಾರಿಗೆ ಬರುವಂತೆ ತಾತ್ಕಾಲಿಕ ನಿಷೇಧ ಹೇರಿದೆ. ಪ್ರಯೋಗಾಲಯದ ತಪಾಸಣೆ ವೇಳೆ ಈ ಎರಡೂ ಬ್ರ್ಯಾಂಡ್ಗಳ ಇಂಗು ಪೌಡರ್ ‘ಕಳಪೆ ಗುಣಮಟ್ಟ’ ಹಾಗೂ ‘ತಪ್ಪು ಲೇಬಲಿಂಗ್’ ನಿಂದ ಕೂಡಿದೆ ಎಂಬುದು ದೃಢಪಟ್ಟ ಹಿನ್ನೆಲೆಯಲ್ಲಿ ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ.
ತಪಾಸಣೆಯಲ್ಲಿ ಬೆಳಕಿಗೆ ಬಂದಿದ್ದೇನು?ಗ್ರಾಹಕರೊಬ್ಬರು ನೀಡಿದ ದೂರಿನ ಆಧಾರದ ಮೇಲೆ FSSAI ಇಂಗು ಬ್ರ್ಯಾಂಡ್ಗಳ ಮಾದರಿಗಳನ್ನು ಸಂಗ್ರಹಿಸಿ ತಪಾಸಣೆಗೆ ಒಳಪಡಿಸಿತ್ತು. ನಿಯಮಗಳ ಪ್ರಕಾರ, ಸಮ್ಮಿಶ್ರ ಇಂಗಿನಲ್ಲಿ (Compounded Asafoetida) ಕನಿಷ್ಠ ಶೇ. 5 ರಷ್ಟು ಆಲ್ಕೋಹಾಲ್-ಕರಗಬಲ್ಲ ಸಾರ (Alcohol Soluble Extract) ಇರಬೇಕು. ಆದರೆ, ಎವೆರೆಸ್ಟ್ ಸಂಸ್ಥೆಯ ಇಂಗು ಮಾದರಿಗಳಲ್ಲಿ ಇದು ಶೇ. 0 ಯಿಂದ ಶೇ. 4.4 ರಷ್ಟು ಮಾತ್ರ ಕಂಡುಬಂದಿದೆ. ಅಂದರೆ ತಯಾರಿಕೆಯಲ್ಲಿ ಕನಿಷ್ಠ ಶೇ. 30 ರಿಂದ 40 ರಷ್ಟು ಕಡಿಮೆ ಮೂಲ ಇಂಗನ್ನು ಬಳಸಲಾಗಿತ್ತು.
ಇತ್ತ ಲಾಲ್ಜೀ ಗೋಧೂ ಸಂಸ್ಥೆಯ ಇಂಗು ತಯಾರಿಕೆಗೆ ಬಳಸುವ ಕಚ್ಚಾ ಪದಾರ್ಥಗಳಲ್ಲಿ ಶೇ. 1 ಕ್ಕಿಂತ ಹೆಚ್ಚು ಪಿಷ್ಟ (Starch) ಇರಬಾರದು. ಆದರೆ ಪರೀಕ್ಷೆಯ ವೇಳೆ ಇವುಗಳಲ್ಲಿ ಶೇ. 15 ರಿಂದ ಶೇ. 32 ರಷ್ಟು ಅಧಿಕ ಪ್ರಮಾಣದ ಸ್ಟಾರ್ಚ್ ಪತ್ತೆಯಾಗಿದೆ.
ಇದಲ್ಲದೆ, ಎವೆರೆಸ್ಟ್ ಸಂಸ್ಥೆಯ ಚಿಕನ್ ಮಸಾಲಾ, ಗರಂ ಮಸಾಲಾ ಮತ್ತು ಎಗ್ ಕರಿ ಮಸಾಲಾಗಳ ಲೇಬಲಿಂಗ್ನಲ್ಲಿ ಉಪ್ಪಿನ ಪ್ರಮಾಣ ಸರಿಯಾಗಿ ನಮೂದಿಸದಿರುವ ಲೋಪಗಳನ್ನೂ FSSAI ಎತ್ತಿಹಿಡಿದಿದೆ. ಸಾರ್ವಜನಿಕರ ಆರೋಗ್ಯ ಭದ್ರತೆಯ ಹಿತದೃಷ್ಟಿಯಿಂದ FSSAI ಈ ಕ್ರಮ ಕೈಗೊಂಡಿದ್ದು, ನಿಯಮ ಪಾಲನೆಯಾಗದಿದ್ದರೆ ಮತ್ತಷ್ಟು ಕಠಿಣ ಕಾನೂನು ಕ್ರಮ ಜರುಗಿಸುವುದಾಗಿ ಎಚ್ಚರಿಸಿದೆ.