ಕೊಚ್ಚಿ:
ಕೇರಳದ ಕೊಚ್ಚಿ ಸಮೀಪದ ನೆಡುಂಬಾಶ್ಯೇರಿ ವಿಮಾನ ನಿಲ್ದಾಣ ರಸ್ತೆಯಲ್ಲಿ ಸಂಭವಿಸಿದ ಭೀಕರ ಕಾರು ಅಪಘಾತ ಪ್ರಕರಣದ ಪ್ರಮುಖ ಆರೋಪಿ ಸುಹೈಲ್ ಸಜೀವ್, ತನ್ನ ಉದ್ದನೆಯ ಕೂದಲನ್ನು ಪೂರ್ತಿಯಾಗಿ ಕತ್ತರಿಸಿ ಸಂಪೂರ್ಣ ಹೊಸ ರೂಪದಲ್ಲಿ ನ್ಯಾಯಾಲಯಕ್ಕೆ ಹಾಜರಾಗಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ಆರೋಪಿಯನ್ನು ಕಾಕ್ಕನಾಡ್‌ನ ಬೋರ್ಸ್ಟಲ್ ಸ್ಕೂಲ್‌ನಿಂದ (Borstal School) ನ್ಯಾಯಾಂಗ ಪ್ರಕ್ರಿಯೆಗಾಗಿ ಆಲುವಾ ನ್ಯಾಯಾಲಯಕ್ಕೆ ಕರೆತರಲಾಗಿತ್ತು. ಈ ವೇಳೆ ಆತನ ರೂಪ ಮತ್ತು ದೇಹಭಾಷೆಯಲ್ಲಿ ಗಮನಾರ್ಹ ಬದಲಾವಣೆ ಕಂಡುಬಂದಿದ್ದು, ಮೊದಲ ನೋಟಕ್ಕೆ ಈತನೇ ಅಪಘಾತದ ಆರೋಪಿ ಸುಹೈಲ್ ಎಂದು ಗುರುತಿಸಲಾಗದ ರೀತಿಯಲ್ಲಿದ್ದ ಎಂದು ವರದಿಯಾಗಿದೆ.
ಸುಹೈಲ್‌ನ ಈ ದಿಢೀರ್ ಹೇರ್‌ಕಟ್ ಜೈಲು ಸಿಬ್ಬಂದಿಯ ಗಮನಕ್ಕೂ ಬಂದಿದ್ದು, ಈ ಬಗ್ಗೆ ಆತನನ್ನು ವಿಚಾರಿಸಲಾಗಿದೆ. ಆದರೆ ಯಾರೂ ತನ್ನ ಮೇಲೆ ಒತ್ತಡ ಹೇರಿಲ್ಲ, ತಾನೇ ಸ್ವತಃ ಈ ನಿರ್ಧಾರ ಕೈಗೊಂಡಿರುವುದಾಗಿ ಆತ ತಿಳಿಸಿದ್ದಾನೆ. ಬೋರ್ಸ್ಟಲ್ ಶಾಲೆಯ ನಿವಾಸಿಗಳ (ಅಂತೇವಾಸಿಗಳು) ಸಾಮಾನ್ಯ ಬಳಕೆಗೆ ಇರಿಸಲಾಗಿದ್ದ ಟ್ರಿಮ್ಮರ್ ಬಳಸಿ ಆತನೇ ಕೂದಲು ಕತ್ತರಿಸಿಕೊಂಡಿದ್ದಾನೆ ಎಂದು ತಿಳಿದುಬಂದಿದೆ. ಸಾಕ್ಷಿಗಳ ಗುರುತಿಸುವಿಕೆ ಪ್ರಕ್ರಿಯೆ (Identification Parade) ಹಾಗೂ ಸಾಕ್ಷ್ಯ ಸಂಗ್ರಹದ ಹಂತಕ್ಕೂ ಮುನ್ನವೇ ಆರೋಪಿ ತನ್ನ ರೂಪ ಬದಲಿಸಿಕೊಂಡಿರುವುದು ಸಾಕ್ಷಿದಾರರನ್ನು ಗೊಂದಲಕ್ಕೀಡುಮಾಡುವ ತಂತ್ರವೇ ಎಂಬ ಸಂಶಯಗಳೂ ವ್ಯಕ್ತವಾಗಿವೆ.
ಸುಳ್ಯ ಕನಕಮಜಲು ಮೂಲದ ಯುವಕ ದುರ್ಮರಣ:
ಮದ್ಯದ ಅಮಲಿನಲ್ಲಿ ಅತಿವೇಗವಾಗಿ ಮಿನಿ ಕೂಪರ್ ಕಾರು ಚಲಾಯಿಸಿಕೊಂಡು ಬಂದ ಸುಹೈಲ್, ಸ್ಕೂಟರ್‌ಗೆ ಹಿಂಬದಿಯಿಂದ ಡಿಕ್ಕಿ ಹೊಡೆದ ಪರಿಣಾಮ ಮೂವರು ಸ್ಥಳದಲ್ಲೇ ಮೃತಪಟ್ಟಿದ್ದರು. ಮೃತಪಟ್ಟವರಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲೂಕಿನ ಕನಕಮಜಲು ಗ್ರಾಮದ 21 ವರ್ಷದ ಯುವಕ ಇಯಾಸ್ (ಇಜಾಜ್) ಕೂಡ ಸೇರಿದ್ದಾರೆ. ಇವರೊಂದಿಗೆ ತೆರಳುತ್ತಿದ್ದ ವಯನಾಡು ಮೂಲದ ದೇವಿಕಾ (21) ಹಾಗೂ ಪಾಲಕ್ಕಾಡ್ ಮೂಲದ ಗೋಪಿಕಾ (22) ಎಂಬ ಯುವತಿಯರು ಕೂಡ ಪ್ರಾಣ ಕಳೆದುಕೊಂಡಿದ್ದರು. ಇವರೆಲ್ಲರೂ ಕೊಚ್ಚಿಯ ತ್ರಿಕ್ಕಾಕ್ಕರದಲ್ಲಿರುವ ಕರಕುಶಲ ಮಳಿಗೆಯೊಂದರಲ್ಲಿ (Craft Shop) ಉದ್ಯೋಗಿಗಳಾಗಿದ್ದರು.
ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುಹೈಲ್ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 105 ರ ಅಡಿಯಲ್ಲಿ ಕೊಲೆಯಲ್ಲದ ನರಹತ್ಯೆ (Culpable Homicide) ಸೇರಿದಂತೆ ಗಂಭೀರ ಕಾಯ್ದೆಗಳಡಿ ಪ್ರಕರಣ ದಾಖಲಿಸಲಾಗಿದ್ದು, ಕಾರಿನಲ್ಲಿದ್ದ ಇತರ ಸಹಚರರನ್ನೂ ಬಂಧಿಸಲಾಗಿದೆ. ಪೊಲೀಸರು ತಾಂತ್ರಿಕ ಹಾಗೂ ಸಿಸಿಟಿವಿ ಸಾಕ್ಷ್ಯಗಳನ್ನು ಸಂಗ್ರಹಿಸುತ್ತಿದ್ದು, ನ್ಯಾಯಾಂಗ ತನಿಖೆ ಮುಂದುವರಿದಿದೆ.