ಭಾರತದಲ್ಲಿ ಇತ್ತೀಚಿನ ದಿನಗಳಲ್ಲಿ ಯುವಕರಲ್ಲಿ ದಿಢೀರ್ ಹೃದಯಾಘಾತ ಪ್ರಕರಣಗಳು ಹೆಚ್ಚುತ್ತಿದ್ದು, ಇದನ್ನು ತಡೆಯಲು ಸಣ್ಣ ವಯಸ್ಸಿನಲ್ಲೇ ಹೃದಯದ ಆರೋಗ್ಯ ತಪಾಸಣೆ ಮಾಡಿಸಿಕೊಳ್ಳುವುದು ಅತ್ಯಗತ್ಯ ಎಂದು ನಾರಾಯಣ ಹೆಲ್ತ್ ಸಂಸ್ಥೆಯ ಸಂಸ್ಥಾಪಕ ಹಾಗೂ ಅಧ್ಯಕ್ಷರಾದ ಡಾ. ದೇವಿ ಶೆಟ್ಟಿ ತಿಳಿಸಿದ್ದಾರೆ.
ಕಾರ್ಡಿಯಾಲಜಿ ಸೊಸೈಟಿ ಆಫ್ ಇಂಡಿಯಾ (CSI) ಮಾರ್ಗಸೂಚಿಗಳನ್ನು ಉಲ್ಲೇಖಿಸಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಯುವ ಪೀಳಿಗೆ ಹಾಗೂ ಫಿಟ್ನೆಸ್ ಪ್ರಿಯರು ತಮ್ಮ ಹೃದಯದ ಬಗ್ಗೆ ಅಲಕ್ಷ್ಯ ವಹಿಸಬಾರದು ಎಂದು ಎಚ್ಚರಿಸಿದ್ದಾರೆ.
17ನೇ ವಯಸ್ಸಿಗೆ ಕೊಲೆಸ್ಟ್ರಾಲ್ ಟೆಸ್ಟ್ ಕಡ್ಡಾಯ! ಪ್ರತಿಯೊಬ್ಬ ವ್ಯಕ್ತಿಯೂ ತನ್ನ 17ನೇ ವಯಸ್ಸಿಗೆ ಒಮ್ಮೆ ರಕ್ತ ಪರೀಕ್ಷೆ ಮಾಡಿಸಿಕೊಳ್ಳಬೇಕು. ಇದರಿಂದ ದೇಹದಲ್ಲಿನ ಹೆಚ್ಚಿನ ಕೊಲೆಸ್ಟ್ರಾಲ್ ಮಟ್ಟವನ್ನು ಮೊದಲೇ ಪತ್ತೆಹಚ್ಚಬಹುದು. ಆರಂಭದಲ್ಲೇ ಇದನ್ನು ಗುರುತಿಸುವುದರಿಂದ ಸೂಕ್ತ ಜೀವನಶೈಲಿ ಹಾಗೂ ಆಹಾರ ಪದ್ಧತಿಯ ಬದಲಾವಣೆಯ ಮೂಲಕ ಭವಿಷ್ಯದಲ್ಲಿ ಎದುರಾಗಬಹುದಾದ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯವನ್ನು ತಗ್ಗಿಸಬಹುದು ಎಂದು ಡಾ. ಶೆಟ್ಟಿ ಹೇಳಿದ್ದಾರೆ.
ಯಾರಿಗೆ ಯಾವಾಗ ತಪಾಸಣೆ ಅಗತ್ಯ?
- 35 ರಿಂದ 40 ವರ್ಷದ ಪುರುಷರು: ಈ ವಯೋಮಾನದ ಪುರುಷರು ಕಡ್ಡಾಯವಾಗಿ ಹೃದಯದ ಸಿಟಿ ಸ್ಕ್ಯಾನ್ (Cardiac CT Scan) ಸೇರಿದಂತೆ ದಿನನಿತ್ಯದ ಹೃದಯ ತಪಾಸಣೆಗೆ ಒಳಗಾಗಬೇಕು.
- ಕುಟುಂಬದ ಇತಿಹಾಸ (Family History): ಕುಟುಂಬದಲ್ಲಿ ಯಾರಿಗಾದರೂ ಹೃದಯ ಕಾಯಿಲೆ ಇದ್ದರೆ, ಅವರು 30 ವರ್ಷ ದಾಟುವವರೆಗೆ ಕಾಯದೆ, ಅದಕ್ಕಿಂತ ಮುಂಚಿತವಾಗಿಯೇ ತಪಾಸಣೆ ಮಾಡಿಸಿಕೊಳ್ಳಬೇಕು.
- ಮಧುಮೇಹಿಗಳು (Diabetes): ಸಕ್ಕರೆ ಕಾಯಿಲೆ ಇರುವವರು ತೀರಾ ಮೊದಲೇ ಹೃದಯದ ಕಾರ್ಯಕ್ಷಮತೆಯ ಮೌಲ್ಯಮಾಪನ ಮಾಡಿಸಿಕೊಳ್ಳುವುದು ಉತ್ತಮ.
ಫಿಟ್ನೆಸ್ ಇದ್ದವರಿಗೂ ಅಪಾಯ ಕಾದಿರಬಹುದು!ಜಿಮ್ನಲ್ಲಿ ವರ್ಕೌಟ್ ಮಾಡುವಾಗ, ಟ್ರೆಡ್ಮಿಲ್ ಮೇಲೆ ಓಡುವಾಗ ಅಥವಾ ಮ್ಯಾರಥಾನ್ನಲ್ಲಿ ಭಾಗವಹಿಸುವಾಗ ಯುವಕರು ದಿಢೀರನೆ ಕುಸಿದು ಬಿದ್ದು ಸಾವನ್ನಪ್ಪುತ್ತಿರುವ ಘಟನೆಗಳು ಇತ್ತೀಚೆಗೆ ಹೆಚ್ಚುತ್ತಿವೆ. ಈ ಬಗ್ಗೆ ಮಾತನಾಡಿದ ಡಾ. ದೇವಿ ಶೆಟ್ಟಿ, “ತಾವು ಫಿಟ್ ಆಗಿದ್ದೇವೆ ಅಂದುಕೊಂಡ ತಕ್ಷಣ ತಾವು ಸಂಪೂರ್ಣ ಆರೋಗ್ಯವಾಗಿದ್ದೇವೆ ಎಂದು ಭಾವಿಸುವುದು ತಪ್ಪು. ರೋಗಲಕ್ಷಣಗಳು ಕಾಣಿಸಿಕೊಳ್ಳದಿದ್ದರೂ ಒಳಗೊಳಗೆ ಗಂಭೀರ ಹೃದಯದ ಸಮಸ್ಯೆ ಇರಬಹುದು” ಎಂದಿದ್ದಾರೆ.
ಸಾಹಸ ಕ್ರೀಡೆ ಹಾಗೂ ಕಠಿಣ ದೈಹಿಕ ಶ್ರಮದ ಕ್ರೀಡೆಗಳಲ್ಲಿ ಪಾಲ್ಗೊಳ್ಳುವ ಹದಿಹರೆಯದವರು ಕೂಡ ವರ್ಷಕ್ಕೊಮ್ಮೆ ಕೇವಲ ಒಂದು ಗಂಟೆಯ ಅವಧಿಯಲ್ಲಿ ಮುಗಿಯುವ ಇಸಿಜಿ (ECG), ರಕ್ತ ಪರೀಕ್ಷೆಯಂತಹ ಮೂಲಭೂತ ತಪಾಸಣೆಗಳನ್ನು ಮಾಡಿಸಿಕೊಳ್ಳಬೇಕು. ಒಂದು ವೇಳೆ ಕಾರ್ಡಿಯಾಕ್ ಸಿಟಿ ಸ್ಕ್ಯಾನ್ ನಾರ್ಮಲ್ ಬಂದರೆ, ಮುಂದಿನ 7 ರಿಂದ 10 ವರ್ಷಗಳವರೆಗೆ ಅದನ್ನು ಮರುಪರೀಕ್ಷಿಸುವ ಅಗತ್ಯವಿರುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಭಾರತೀಯರಲ್ಲಿ ರೋಗಲಕ್ಷಣಗಳು ತೀವ್ರವಾಗುವವರೆಗೂ ವೈದ್ಯರ ಬಳಿ ಹೋಗದಿರುವ ಅಭ್ಯಾಸವಿದೆ. ಈ ಧೋರಣೆಯನ್ನು ಬದಲಾಯಿಸಿಕೊಂಡು, ಮುನ್ನೆಚ್ಚರಿಕೆಯಾಗಿ ತಪಾಸಣೆ ಮಾಡಿಸಿಕೊಂಡರೆ ರಕ್ತನಾಳಗಳ ಬ್ಲಾಕೇಜ್ಗಳನ್ನು ಮೊದಲೇ ಪತ್ತೆಹಚ್ಚಿ ಪ್ರಾಣಾಪಾಯದಿಂದ ಪಾರಾಗಬಹುದು ಎಂದು ಡಾ. ದೇವಿ ಶೆಟ್ಟಿ ದೇಶದ ಜನತೆಗೆ ಕರೆ ನೀಡಿದ್ದಾರೆ.