ಪುಣೆ: ಮಹಾರಾಷ್ಟ್ರದ ಪುಣೆಯಲ್ಲಿ ಉದ್ಯಮಿ ಕೇತನ್ ಅಗರ್ವಾಲ್ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸುತ್ತಿರುವ ಪೊಲೀಸರಿಗೆ ತೀವ್ರ ದಿಗ್ಭ್ರಮೆ ಮೂಡಿಸುವ ಮತ್ತೊಂದು ಸ್ಫೋಟಕ ಸತ್ಯ ವಿಚಾರಣೆಯ ವೇಳೆ ಬಯಲಾಗಿದೆ. ಭಾವಿ ಪತಿಯನ್ನು ಕೊಲೆಗೈದ ಆರೋಪಿ ಸಿಯಾ ಗೋಯಲ್, ಮದುವೆಯ ಶಾಪಿಂಗ್ ಹಾಗೂ ಇತರೆ ಸಿದ್ಧತೆಗಳ ನೆಪವೊಡ್ಡಿ ಕೇತನ್ನಿಂದ ಬರೋಬ್ಬರಿ 1 ಕೋಟಿ ರೂಪಾಯಿ ಹಣವನ್ನು ಪಡೆದುಕೊಂಡಿದ್ದಳು ಎನ್ನುವ ಅಂಶ ತನಿಖೆಯಿಂದ ತಿಳಿದುಬಂದಿದೆ. ಆದರೆ, ಆಕೆ ಈ ಭಾರಿ ಮೊತ್ತದ ಹಣವನ್ನು ತನ್ನ ಮದುವೆಯ ಯಾವುದೇ ಸಿದ್ಧತೆಗಳಿಗೆ ಬಳಸದೆ, ಸಂಪೂರ್ಣವಾಗಿ ತನ್ನ ಪ್ರಿಯಕರ ಚೇತನ್ ಚೌಧರಿಯ ಬ್ಯಾಂಕ್ ಖಾತೆಗೆ ಗುಟ್ಟಾಗಿ ವರ್ಗಾವಣೆ ಮಾಡಿದ್ದಳು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ಪ್ರಿಯಕರ ಚೇತನ್ ಚೌಧರಿಯ ಆರ್ಥಿಕ ಪರಿಸ್ಥಿತಿ ತೀರಾ ಹದಗೆಟ್ಟಿರುವುದನ್ನು ಗಮನಿಸಿದ್ದ ಸಿಯಾ ಗೋಯಲ್, ಆತನಿಗೆ ಆಸರೆಯಾಗಲು ಹಾಗೂ ಆತನ ವೃತ್ತಿಜೀವನವನ್ನು (Career) ಉತ್ತಮವಾಗಿ ಕಟ್ಟಿಕೊಡುವ ದುರುದ್ದೇಶದಿಂದ ಭಾವಿ ಪತಿಯ ಹಣವನ್ನೇ ಆತನ ಅಕೌಂಟ್ಗೆ ಜಮೆ ಮಾಡಿದ್ದಳು. ಅಷ್ಟೇ ಅಲ್ಲದೆ, ಹಣ ವರ್ಗಾವಣೆಯಾದ ಬೆನ್ನಲ್ಲೇ ಪಕ್ಕಾ ಸ್ಕೆಚ್ ಹಾಕಿ ಕೇತನ್ನನ್ನು ದಾರಿಯಿಂದ ಮುಳ್ಳು ಸರಿಸಿದಂತೆ ಕೊಲೆ ಮಾಡಿದ್ದಾಳೆ. ಕೊಲೆಯಾದ ಬಳಿಕ ಸುಮಾರು 3 ವರ್ಷಗಳ ಕಾಲ ಯಾರಿಗೂ ಅನುಮಾನ ಬಾರದಂತೆ ಸುಮ್ಮನಿದ್ದು, ತದನಂತರ ಅದೇ ಹಣದಲ್ಲಿ ಪ್ರಿಯಕರ ಚೇತನ್ನನ್ನು ಮದುವೆಯಾಗಲು ಈ ಕಿರಾತಕಿ ಮಾಸ್ಟರ್ ಪ್ಲಾನ್ ರೂಪಿಸಿದ್ದಳು ಎಂಬ ಭಯಾನಕ ಸತ್ಯ ಇದೀಗ ಹೊರಬಿದ್ದಿದೆ. ಸದ್ಯ ಪ್ರಕರಣದ ತೀವ್ರತೆಯನ್ನು ಪರಿಗಣಿಸಿರುವ ಸ್ಥಳೀಯ ನ್ಯಾಯಾಲಯವು ಆರೋಪಿಗಳಾದ ಸಿಯಾ ಗೋಯಲ್ ಮತ್ತು ಚೇತನ್ ಚೌಧರಿಯ ಪೊಲೀಸ್ ಕಸ್ಟಡಿಯನ್ನು ಜುಲೈ 3ರವರೆಗೆ ವಿಸ್ತರಿಸಿದ್ದು, ಪುಣೆ ಪೊಲೀಸರು ಹಣಕಾಸಿನ ವಹಿವಾಟಿನ ಕುರಿತು ಮತ್ತಷ್ಟು ಆಳವಾದ ತನಿಖೆ ಕೈಗೊಂಡಿದ್ದಾರೆ.