ವಿಜಯವಾಡ (ಆಂಧ್ರಪ್ರದೇಶ): ಯೋಗವು ಕೇವಲ ದೈಹಿಕ ವ್ಯಾಯಾಮವಲ್ಲ, ಅದು ಆರೋಗ್ಯ, ಶಿಸ್ತು ಮತ್ತು ಸಾಮಾಜಿಕ ಸಾಮರಸ್ಯವನ್ನು ಬೆಳೆಸುವ ಅತ್ಯುತ್ತಮ ಸಾಧನವಾಗಿದೆ. ಯೋಗಕ್ಕೆ ಸಮಾಜ, ದೇಶ ಮತ್ತು ಇಡೀ ಜಗತ್ತನ್ನು ಒಗ್ಗೂಡಿಸುವ ಅಪಾರ ಸಾಮರ್ಥ್ಯವಿದೆ ಎಂದು ಯೋಗ ಗುರು ಬಾಬಾ ರಾಮದೇವ್ ಹೇಳಿದ್ದಾರೆ.
ಜೂನ್ 21 ರಂದು (ನಾಳೆ) ನಡೆಯಲಿರುವ ‘ಅಂತರರಾಷ್ಟ್ರೀಯ ಯೋಗ ದಿನಾಚರಣೆ’ಯ (International Yoga Day) ಮುನ್ನಾದಿನದಂದು ಆಂಧ್ರಪ್ರದೇಶದ ವಿಜಯವಾಡದಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಪ್ರತಿಯೊಬ್ಬರೂ ಯೋಗವನ್ನು ತಮ್ಮ ಜೀವನದ ಒಂದು ಭಾಗವಾಗಿ ಅಳವಡಿಸಿಕೊಳ್ಳಬೇಕು ಎಂದು ಕರೆ ನೀಡಿದರು.
”ಯೋಗವು ರೋಗಿಗಳಿಗೆ ಒಂದು ಅತ್ಯುತ್ತಮ ಚಿಕಿತ್ಸೆ (Therapy), ಯೋಗಿಗಳಿಗೆ ಅದೊಂದು ಸಾಧನಾ ಮಾರ್ಗ ಹಾಗೂ ಸಾಮಾನ್ಯ ಜನರಿಗೆ ಅದೊಂದು ಸುಂದರ ಜೀವನ ಶೈಲಿ. ಯೋಗದ ಮೂಲಕ ನಮ್ಮ ಸಮಾಜ, ರಾಷ್ಟ್ರ ಮತ್ತು ಇಡೀ ಜಗತ್ತು ಒಂದಾಗಲಿ. ಪ್ರಸ್ತುತ ಜಗತ್ತಿನ ಎಲ್ಲಾ ಸಮಸ್ಯೆಗಳಿಗೂ ಯೋಗವೇ ಏಕೈಕ ಮದ್ದು” ಎಂದು ಬಾಬಾ ರಾಮದೇವ್ ಅಭಿಪ್ರಾಯಪಟ್ಟರು.
ಮೋದಿ, ಚಂದ್ರಬಾಬು ನಾಯ್ಡು ‘ಕರ್ಮಯೋಗಿಗಳು’: ಇದೇ ಸಂದರ್ಭದಲ್ಲಿ ದೇಶದ ರಾಜಕೀಯ ನಾಯಕರನ್ನು ಶ್ಲಾಘಿಸಿದ ಅವರು, “ಪ್ರಧಾನಿ ನರೇಂದ್ರ ಮೋದಿ ಮತ್ತು ಆಂಧ್ರಪ್ರದೇಶದ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಅವರು ನಿಜವಾದ ಕರ್ಮಯೋಗಿಗಳು. ದೇಶದ ಎಲ್ಲಾ ಮುಖ್ಯಮಂತ್ರಿಗಳು ಇದೇ ಕರ್ಮಯೋಗದ ಉತ್ಸಾಹ ಮತ್ತು ಶಿಸ್ತಿನಿಂದ ಕೆಲಸ ಮಾಡಿದರೆ, ಭಾರತವು ನಿಗದಿಗಿಂತ ಮುನ್ನವೇ, ಅಂದರೆ 2047 ಕ್ಕಿಂತ ಮುಂಚಿತವಾಗಿಯೇ ಅಭಿವೃದ್ಧಿ ಹೊಂದಿದ ರಾಷ್ಟ್ರವಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಈ ಬಾರಿಯ ಯೋಗ ದಿನದ ವಿಶೇಷ ಥೀಮ್: ಪ್ರಧಾನಿ ನರೇಂದ್ರ ಮೋದಿ ಅವರ ಪ್ರಸ್ತಾಪದ ಮೇರೆಗೆ ವಿಶ್ವಸಂಸ್ಥೆಯು 2014 ರ ಡಿಸೆಂಬರ್ನಲ್ಲಿ ಜೂನ್ 21 ಅನ್ನು ಅಂತರರಾಷ್ಟ್ರೀಯ ಯೋಗ ದಿನ ಎಂದು ಘೋಷಿಸಿತು. 2026 ನೇ ವರ್ಷವು ಯೋಗ ದಿನಾಚರಣೆಯ 12ನೇ ಆವೃತ್ತಿಯಾಗಿದೆ. ಈ ವರ್ಷದ ಯೋಗ ದಿನದ ಅಧಿಕೃತ ಥೀಮ್ “ಆರೋಗ್ಯಕರ ವೃದ್ಧಾಪ್ಯಕ್ಕಾಗಿ ಯೋಗ” (Yoga for Healthy Ageing) ಎಂಬುದಾಗಿದೆ. ಎಲ್ಲಾ ವಯಸ್ಸಿನ ಜನರು ಸಕ್ರಿಯವಾಗಿ, ಸ್ವಾವಲಂಬಿಯಾಗಿ ಮತ್ತು ಉತ್ಸಾಹದಿಂದ ಇರಲು ಯೋಗ ಹೇಗೆ ಸಹಾಯ ಮಾಡುತ್ತದೆ ಎಂಬುದನ್ನು ಈ ಥೀಮ್ ಬಿಂಬಿಸುತ್ತದೆ.