ಬೆಂಗಳೂರು: ಅನುಭವಿ ವೇಗಿಗಳಾದ ಜೋಶ್ ಹ್ಯಾಜಲ್ವುಡ್ ಮತ್ತು ಭುವನೇಶ್ವರ್ ಕುಮಾರ್ ಅವರ ನಿಖರ ದಾಳಿ ಹಾಗೂ ಯುವ ಆಟಗಾರ ರಸಿಖ್ ಸಲಾಮ್ ದಾರ್ ಅವರ ಅದ್ಭುತ ಬೌಲಿಂಗ್ ನೆರವಿನಿಂದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಲಕ್ನೋ ಸೂಪರ್ ಜಂಟ್ಸ್ ವಿರುದ್ಧ 5 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿದೆ.
ಬುಧವಾರ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಆತಿಥೇಯ ಆರ್ಸಿಬಿ ಸರ್ವತೋಮುಖ ಪ್ರದರ್ಶನ ನೀಡುವ ಮೂಲಕ ಅಭಿಮಾನಿಗಳಲ್ಲಿ ಸಂಭ್ರಮ ಮೂಡಿಸಿದೆ.
ಬೌಲರ್ಗಳ ಕಪಿಮುಷ್ಠಿಯಲ್ಲಿ ಲಕ್ನೋ
ಪಂದ್ಯದ ಆರಂಭದಿಂದಲೇ ಲಕ್ನೋ ಬ್ಯಾಟರ್ಗಳನ್ನು ಕಟ್ಟಿಹಾಕುವಲ್ಲಿ ಬೆಂಗಳೂರಿನ ಬೌಲರ್ಗಳು ಯಶಸ್ವಿಯಾದರು. ಹ್ಯಾಜಲ್ವುಡ್ ಮತ್ತು ಭುವನೇಶ್ವರ್ ತಮ್ಮ ಅನುಭವವನ್ನು ಧಾರೆ ಎರೆದರೆ, ರಸಿಖ್ ಸಲಾಮ್ ತಮ್ಮ ವೇಗದ ಮೂಲಕ ಗಮನ ಸೆಳೆದರು. ಪರಿಣಾಮವಾಗಿ ಲಕ್ನೋ ತಂಡವು ನಿಗದಿತ ಓವರ್ಗಳಲ್ಲಿ ಕೇವಲ 146 ರನ್ ಗಳಿಸಲಷ್ಟೇ ಶಕ್ತವಾಯಿತು.
ಸಾಮಾನ್ಯವಾಗಿ ರನ್ ಮಳೆಯಾಗುವ ಚಿನ್ನಸ್ವಾಮಿ ಪಿಚ್ ಈ ಬಾರಿ ಸ್ವಲ್ಪ ನಿಧಾನಗತಿಯಿಂದ ಕೂಡಿತ್ತು. ಇದು ಚೇಸಿಂಗ್ ವೇಳೆ ಆರ್ಸಿಬಿಗೆ ಸವಾಲಾಗಬಹುದು ಎಂದು ಭಾವಿಸಲಾಗಿತ್ತು. ಆದರೆ ಕಿಂಗ್ ವಿರಾಟ್ ಕೊಹ್ಲಿ (49) ಮತ್ತು ನಾಯಕ ರಜತ್ ಪಾಟಿದಾರ್ (27) ಜವಾಬ್ದಾರಿಯುತ ಆಟವಾಡಿ ತಂಡವನ್ನು ಗೆಲುವಿನ ಹತ್ತಿರ ತಂದರು. ಅಂತಿಮವಾಗಿ ಬೆಂಗಳೂರು ತಂಡವು ಕೇವಲ 15.1 ಓವರ್ಗಳಲ್ಲಿ ಗುರಿಯನ್ನು ತಲುಪಿ ಗೆಲುವಿನ ನಗೆ ಬೀರಿದೆ.