ಬೆಂಗಳೂರು:ಚಿನ್ನಸ್ವಾಮಿ ಕ್ರೀಡಾಂಗಣದ ಬಳಿ ನಡೆದಿದ್ದ ಭೀಕರ ತಳ್ಳಾಟ ಹಾಗೂ ನುಗ್ಗಾಟ (Stampede) ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾಜಿ ಬೆಂಗಳೂರು ಪೊಲೀಸ್ ಕಮಿಷನರ್ ಬಿ. ದಯಾನಂದ್ ಸೇರಿದಂತೆ ಮೂವರು ಹಿರಿಯ ಐಪಿಎಸ್ ಅಧಿಕಾರಿಗಳನ್ನು ಕರ್ನಾಟಕ ಸರ್ಕಾರ ದೋಷಮುಕ್ತಗೊಳಿಸಿದೆ. ಅಧಿಕಾರಿಗಳ ವಿರುದ್ಧ ಹೂಡಲಾಗಿದ್ದ ಇಲಾಖಾ ತನಿಖಾ ಪ್ರಕ್ರಿಯೆಗಳನ್ನು ಮುಕ್ತಾಯಗೊಳಿಸಿ ರಾಜ್ಯ ಸರ್ಕಾರ ಅಧಿಕೃತ ಆದೇಶ ಹೊರಡಿಸಿದೆ.
ಏನಿದು ಪ್ರಕರಣ? 2025ರ ಜೂನ್ 4 ರಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಐಪಿಎಲ್ ಗೆಲುವಿನ ಸಂಭ್ರಮಾಚರಣೆ ವೇಳೆ ಚಿನ್ನಸ್ವಾಮಿ ಕ್ರೀಡಾಂಗಣದ ಹೊರಭಾಗದಲ್ಲಿ ಭಾರಿ ಜನದಟ್ಟಣೆಯಿಂದಾಗಿ ತಳ್ಳಾಟ ನಡೆದಿತ್ತು. ಈ ದುರ್ಘಟನೆಯಲ್ಲಿ 11 ಜನರು ಪ್ರಾಣ ಕಳೆದುಕೊಂಡಿದ್ದರು. ಘಟನೆಗೆ ಸಂಬಂಧಿಸಿದಂತೆ ಕರ್ತವ್ಯ ಲೋಪದ ಆರೋಪದ ಮೇಲೆ ಅಂದಿನ ಬೆಂಗಳೂರು ಪೊಲೀಸ್ ಕಮಿಷನರ್ ಬಿ. ದಯಾನಂದ್, ಡಿಸಿಪಿ (ಕೇಂದ್ರ ವಿಭಾಗ) ಶೇಖರ್ ಎಚ್. ತೆಕ್ಕಣ್ಣವರ್ ಮತ್ತು ಅಂದಿನ ಹೆಚ್ಚುವರಿ ಪೊಲೀಸ್ ಕಮಿಷನರ್ (ಪಶ್ಚಿಮ) ವಿಕಾಶ್ ಕುಮಾರ್ ವಿಕಾಶ್ ಅವರ ವಿರುದ್ಧ ಶಿಸ್ತು ಕ್ರಮ ಜರುಗಿಸಲಾಗಿತ್ತು.
ಸರ್ಕಾರದ ಆದೇಶದಲ್ಲಿ ಏನಿದೆ? ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆಯು ಜುಲೈ 14, 2026 ರಂದು ಪ್ರತ್ಯೇಕ ಆದೇಶಗಳನ್ನು ಹೊರಡಿಸಿದೆ. ಅಧಿಕಾರಿಗಳು ಸಿದ್ದಗೊಳಿಸಿದ ಸಮರ್ಥನಾ ಹೇಳಿಕೆಗಳು ಮತ್ತು ಆಡಳಿತಾತ್ಮಕ ಇಲಾಖೆಯ ಅಭಿಪ್ರಾಯಗಳನ್ನು ಕೂಲಂಕಷವಾಗಿ ಪರಿಶೀಲಿಸಿದ ನಂತರ, ಸಕ್ಷಮ ಪ್ರಾಧಿಕಾರವು ಇಲಾಖಾ ವಿಚಾರಣೆಯನ್ನು ಕೈಬಿಡಲು ನಿರ್ಧರಿಸಿದೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
- ದಯಾನಂದ್ (ಮಾಜಿ ಪೊಲೀಸ್ ಕಮಿಷನರ್): ಘಟನೆಯ ಬೆನ್ನಲ್ಲೇ 2025ರ ಜೂನ್ 5 ರಂದು ಇವರನ್ನು ಅಮಾನತುಗೊಳಿಸಲಾಗಿತ್ತು. ನಂತರ ಜುಲೈ 28ರಂದು ಅಮಾನತು ಹಿಂಪಡೆದು ಇಲಾಖಾ ತನಿಖೆ ಆರಂಭಿಸಲಾಗಿತ್ತು. ದಯಾನಂದ್ ಅವರು ಸೆಪ್ಟೆಂಬರ್ 8, 2025 ರಂದು ತಮ್ಮ ಮೇಲಿನ ಆರೋಪಗಳನ್ನು ನಿರಾಕರಿಸಿ ಸುದೀರ್ಘ ವಿವರಣೆ ನೀಡಿದ್ದರು. ಇದನ್ನು ಅಂಗೀಕರಿಸಿರುವ ಸರ್ಕಾರ ಈಗ ಅವರನ್ನು ಸಂಪೂರ್ಣ ದೋಷಮುಕ್ತಗೊಳಿಸಿದೆ.
- ವಿಕಾಶ್ ಕುಮಾರ್ (ಮಾಜಿ ಹೆಚ್ಚುವರಿ ಕಮಿಷನರ್): ಇವರ ಮೇಲಿನ ಆರೋಪಗಳೂ ಸಾಬೀತಾಗದ ಹಿನ್ನೆಲೆಯಲ್ಲಿ ಇಲಾಖಾ ವಿಚಾರಣೆಯನ್ನು ಕ್ಲೋಸ್ ಮಾಡಲಾಗಿದೆ.
- ಶೇಖರ್ ಎಚ್. ತೆಕ್ಕಣ್ಣವರ್ (ಮಾಜಿ ಡಿಸಿಪಿ): ತೆಕ್ಕಣ್ಣವರ್ ಅವರ ವಿಚಾರಣೆಯನ್ನೂ ಕೈಬಿಡಲಾಗಿದೆಯಾದರೂ, ಭವಿಷ್ಯದಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ಅತ್ಯಂತ ಜವಾಬ್ದಾರಿಯುತವಾಗಿ ನಡೆದುಕೊಳ್ಳಬೇಕು ಎಂದು ಸರ್ಕಾರ ಎಚ್ಚರಿಕೆ (Warning) ನೀಡಿದೆ.
ಈ ಮಹತ್ವದ ಆದೇಶದೊಂದಿಗೆ ಕಳೆದ ಒಂದು ವರ್ಷದಿಂದ ಐಪಿಎಸ್ ಅಧಿಕಾರಿಗಳ ವಲಯದಲ್ಲಿ ತೀವ್ರ ಕುತೂಹಲ ಮೂಡಿಸಿದ್ದ ಹೈಪ್ರೊಫೈಲ್ ಇಲಾಖಾ ತನಿಖೆಗೆ ತೆರೆ ಬಿದ್ದಂತಾಗಿದೆ.