ರಾಜ್ಯ

ಉದ್ಯಾವರ : ಲಕ್ಷಾಂತರ ರೂಪಾಯಿ ಮೌಲ್ಯದ ನಗ-ನಗದು ಕಳವು

ಕಾಪು: ಉದ್ಯಾವರ ಗುಡ್ಡೆಯಂಗಡಿಯಲ್ಲಿ ಮನೆಯ ಬೀಗ ಮುರಿದು ಒಳನುಗ್ಗಿದ ಕಳ್ಳರು 116 ಪವನ್‌ ತೂಕದ ಚಿನ್ನಾಭರಣಗಳ ಸಹಿತ ಲಕ್ಷಾಂತರ ರೂಪಾಯಿ ಮೌಲ್ಯದ ನಗ-ನಗದನ್ನು ದೋಚಿ ಪರಾರಿಯಾದ ಘಟನೆ ಬೆಳಕಿಗೆ ಬಂದಿದೆ.

ಉದ್ಯಾವರ ಗ್ರಾಮದ ರೇಷ್ಮಾ ಮಗಳ ಜತೆಗೆ ಪತಿ ಮನೆಗೆ ತೆರಳಿದ್ದು, ವಾಪಸು ಬಂದು ನೋಡಿದಾಗ ಕಳ್ಳತನ ಪ್ರಕರಣ ಬೆಳಕಿಗೆ ಬಂದಿದೆ. ರೇಷ್ಮಾ ಅವರು 15 ವರ್ಷಗಳಿಂದ ಉದ್ಯಾವರ ಗ್ರಾಮದ ಗುಡ್ಡೆಯಂಗಡಿಯಲ್ಲಿರುವ ಚಂದ್ರಕಾಂತ್‌ ಅವರಿಗೆ ಸೇರಿದ ಮನೆಯ ಮೊದಲ ಮಹಡಿಯಲ್ಲಿ ಬಾಡಿಗೆಗೆ ವಾಸ ಮಾಡಿಕೊಂಡಿದ್ದು, ಮನೆಯ ನೆಲಮಹಡಿಯಲ್ಲಿ ಮನೆಯ ಮಾಲಿಕರು ವಾಸವಿದ್ದರು. ಮನೆ ಮಾಲಕರು ಜ. 14ರಂದು ಮುಂಬಯಿಗೆ ಹೋಗಿದ್ದು, ರೇಷ್ಮಾ ಅವರು ಮಗಳ ಜತೆಗೆ ಜ. 25ರಂದು ಪರ್ಕಳದಲ್ಲಿರುವ ಗಂಡನ ಮನೆಗೆ ತೆರಳಿದ್ದರು.

ಜ. 29ರಂದು ಸಂಜೆ 5.30ಕ್ಕೆ ಉದ್ಯಾವರದ ಮನೆಗೆ ಬಂದಾಗ ಮನೆಯ ಮುಖ್ಯ ಬಾಗಿಲು ತೆರೆದಿದ್ದು, ಒಳಗಡೆ ಹೋಗಿ ನೋಡಿದಾಗ ಮಲಗುವ ಕೋಣೆಯಲ್ಲಿದ್ದ ಮೂರು ಕಪಾಟುಗಳು ತೆರೆದಿದ್ದು, ಅದರೊಳಗಿದ್ದ 116 ಪವನ್‌ ಚಿನ್ನದ ಆಭರಣಗಳು, 100 ಗ್ರಾಂನಷ್ಟು ಬೆಳ್ಳಿಯ ದೇವರ ಸಾಮಗ್ರಿಗಳು ಹಾಗೂ 30 ಸಾವಿರ ರೂಪಾಯಿ ಕಳವಾಗಿರುವ ಬೆಳಕಿಗೆ ಬಂದಿದೆ.

ಜ. 25ರಿಂದ ಜ. 29ರ ನಡುವಿನ ಅವಧಿಯಲ್ಲಿ ಕಳ್ಳರು ಮನೆಯ ಮುಖ್ಯ ಬಾಗಿಲನ್ನು ಬಲವಂತವಾಗಿ ಮುರಿದು, ತೆರೆದು ಒಳಪ್ರವೇಶಿಸಿ ಮಲಗುವ ಕೋಣೆಯ ಬಾಗಿಲದ ಕೀಯನ್ನು ಮುರಿದು ಕಪಾಟಿನಲ್ಲಿದ್ದ ನಗದು ಹಣ, ಚಿನ್ನಾಭರಣ ಹಾಗೂ ಬೆಳ್ಳಿ ಸಾಮಗ್ರಿಗಳನ್ನು ಕಳವು ಮಾಡಿಕೊಂಡು ಹೋಗಿರುವುದಾಗಿ ರೇಷ್ಮಾ ನೀಡಿರುವ ದೂರಿನಂತೆ ಕಾಪು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಹೆಚ್ಚುವರಿ ಪೊಲೀಸ್‌ ಅಧೀಕ್ಷಕ ಎಚ್‌. ಸಿದ್ಧಲಿಂಗಪ್ಪ, ಡಿವೈಎಸ್ಪಿ ಅರವಿಂದ ಕಲಗುಜ್ಜಿ, ವೃತ್ತ ನಿರೀಕ್ಷಕಿ ಜಯಶ್ರೀ ಮಾನೆ, ಎಸ್ಸೈ ತೇಜಸ್ವಿ, ಶ್ವಾನದಳ, ಬೆಳರಚ್ಚು, ವಿಧಿ ವಿಜ್ಞಾನ ಪ್ರಯೋಗಾಲಯದ ಸಿಬಂದಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

Leave a Response

error: Content is protected !!