ಸಂಪಾದಕೀಯ
ಬಿ.ಕೆ.ಎಸ್. ಅಯ್ಯಂಗಾರರು ಯೋಗವನ್ನು ಜಾಗತಿಕ ಮಟ್ಟದಲ್ಲಿ ಪ್ರಸಿದ್ಧಿಗೊಳಿಸಿದ ಭಾರತೀಯ ಯೋಗ ಗುರು. ಅವರ ಹೆಸರು ಯೋಗದ “ಅಯ್ಯಂಗಾರ್ ಶೈಲಿ”ಗಾಗಿ ಪ್ರಸಿದ್ಧವಾಗಿದೆ.
ಇವರ ಪೂರ್ತಿ ಹೆಸರು ಬಲ್ಲೂರು ಕೃಷ್ಣಮಾಚಾರ ಸುಂದರರಾಜ ಅಯ್ಯಂಗಾರ್. ಇವರು 1918 ರ ಡಿಸೆಂಬರ್ 14 ರಂದು ಕರ್ನಾಟಕ ರಾಜ್ಯದ ಕೊಲಾರ ಜಿಲ್ಲೆಯ ಬೆಳ್ಳೂರು ಎಂಬ ಗ್ರಾಮದಲ್ಲಿ ಜನಿಸಿದರು. ಅವರ ತಂದೆ ಶೇಶಮಾರಾಯ ಅಯ್ಯಂಗಾರ್. ಅವರು ಒಂದು ಚಿಕ್ಕ ಹಳ್ಳಿಯ ಶಾಲೆಯಲ್ಲಿ ಶಿಕ್ಷಕರಾಗಿದ್ದರು. ಅವರ ತಾಯಿಯ ಹೆಸರು ಶಾಂಬವಾಮ್ಮ. ಅಯ್ಯಂಗಾರರು ತಮ್ಮ ತಂದೆ ತಾಯಿಯ 11ನೇ ಕುಡಿಯಾಗಿ ಜನಿಸಿದರು.
ಅಯ್ಯಂಗಾರರು ತಮ್ಮ ಬಾಲ್ಯದಲ್ಲಿ ಟೈಫಾಯ್ಡ್, ಮಲೇರಿಯಾ, ಟಿಬಿ(ಕ್ಷಯ ರೋಗ) ಹೀಗೆ ಅನೇಕ ಆರೋಗ್ಯ ಸಮಸ್ಯೆಗಳನ್ನು ಎದುರಿಸಿದರು. ಸಾಂಕ್ರಾಮಿಕ ರೋಗಗಳು ಮತ್ತು ಪೋಷಕಾಂಶದ ಕೊರತೆ ಅವರ ಆರೋಗ್ಯವನ್ನು ಆಗಾಗ್ಗೆ ಬಾಧಿಸುತ್ತಿತ್ತು. ಅವರು 9ನೇ ವಯಸ್ಸಿನಾಗಿದ್ದಾಗಲೇ ಅವರ ತಂದೆ ನಿಧನರಾದರು. ಪರಿಣಾಮವಾಗಿ, ಅವರ ಕುಟುಂಬ ಆರ್ಥಿಕ ತೊಂದರೆಗಳನ್ನು ಎದುರಿಸಬೇಕಾಯಿತು. ಇದರಿಂದ ಅವರ ಶಿಕ್ಷಣಕ್ಕೂ ಅಡಚಣೆಯಾಯಿತು.
ಅಯ್ಯಂಗಾರರು 15ನೇ ವಯಸ್ಸಿನಲ್ಲಿ ತಮ್ಮ ಮಾವ ತಿರುಮಲೈ ಕೃಷ್ಣಮಾಚಾರ ಅವರ ಮಾರ್ಗದರ್ಶನದಲ್ಲಿ ಯೋಗ ಶಿಕ್ಷಣವನ್ನು ಪ್ರಾರಂಭಿಸಿದರು. ತಮ್ಮ ಯೋಗಾಭ್ಯಾಸದ ಮೂಲಕ ಸ್ವಯಂ ಆರೋಗ್ಯವನ್ನು ಸುಧಾರಿಸಿಕೊಂಡರು. ಯೋಗದ ಮಹತ್ವವನ್ನು ಅರಿತ ಅಯ್ಯಂಗಾರರು, ಯೋಗ ವಿಜ್ಞಾನ ಮತ್ತು ಕಲೆಯನ್ನು ಶ್ರದ್ಧಾ – ಭಕ್ತಿಯಿಂದ ಕಲಿತು, ತಮ್ಮ ತಾತ್ವಿಕ ಅರಿವು, ಅಗಾಧವಾದ ಯೋಗಾಭ್ಯಾಸ ಮತ್ತು ಅದರ ಕುರಿತಾದ ಜ್ಞಾನದಿಂದ ಯೋಗವನ್ನು ಜನಪ್ರಿಯ ಶೈಲಿಯನ್ನಾಗಿ ರೂಪಿಸಿದರು.
ಅವರು 1943ರಲ್ಲಿ ರಮಾಮಣಿ ಅಯ್ಯಂಗಾರ್ ಅವರನ್ನು ವಿವಾಹವಾದರು. ರಮಾಮಣಿಯವರು ಅಯ್ಯಂಗಾರರ ಜೀವನಕ್ಕೆ ಬಲವಾದ ಮೌಲ್ಯಯುತ ಬೆಂಬಲ ನೀಡಿದರು. ಶ್ರೀಮತಿ ರಮಾಮಣಿಯವರ ಸ್ಮರಣಾರ್ಥವಾಗಿ, ಪುಣೆಯಲ್ಲಿ “ರಮಾಮಣಿ ಅಯ್ಯಂಗಾರ್ ಸ್ಮಾರಕ ಯೋಗ ಸಂಸ್ಥೆ” ಯನ್ನು ಸ್ಥಾಪಿಸಲಾಯಿತು. ಅಯ್ಯಂಗಾರರಿಗೆ ಐವರು ಪುತ್ರರು ಮತ್ತು ಇಬ್ಬರು ಪುತ್ರಿಯರು ಇದ್ದಾರೆ. ಮಗಳು ಗೀತಾ ಅಯ್ಯಂಗಾರ್ ಯೋಗ ಪರಿಣಿತರಾಗಿದ್ದು, ಯೋಗವನ್ನೇ ವೃತ್ತಿಯಾಗಿಸಿಕೊಂಡರು. ಮಹಿಳೆಯರಿಗಾಗಿ ಯೋಗ – ಇದರ ಕುರಿತು ಹೆಚ್ಚಿನ ಆಸಕ್ತಿ ವಹಿಸಿದ್ದಾರೆ.
ಮಗ ಪ್ರಶಾಂತ್ ಅಯ್ಯಂಗಾರ್ ಯೋಗ ಗುರು ಮತ್ತು ಲೇಖಕರಾಗಿದ್ದು, ಅಯ್ಯಂಗಾರ್ ಯೋಗವನ್ನು ಜಗತ್ತಿನಾದ್ಯಂತ ಪ್ರಚಾರ ಮಾಡಿದರು. ಗೀತಾ ಮತ್ತು ಪ್ರಶಾಂತ್ ಜೊತೆಗೆ ವಜ್ರ, ಸುನಿತಾ, ಚಂದ್ರಕಾಂತ್, ರಘು, ಮತ್ತು ವಿಲಾಸ್ ಎಂಬ ಮಕ್ಕಳಿದ್ದಾರೆ.
ಅವರು “Light on Yoga” ಎಂಬ ಪುಸ್ತಕವನ್ನು ಬರೆದಿದ್ದು, ಅದು ಯೋಗಾಭ್ಯಾಸವನ್ನು ಜಗತ್ತಿನೆಲ್ಲೆಡೆ ಪ್ರಸಿದ್ಧಿಗೊಳಿಸಿತು. Light on Yoga”, “Light on Pranayama” ಮತ್ತು “The Tree of Yoga” ಸೇರಿದಂತೆ ಅವರ ಕೃತಿಗಳು ಯೋಗದ ಬಗ್ಗೆ ವೈಜ್ಞಾನಿಕ ಮತ್ತು ಆಧ್ಯಾತ್ಮಿಕ ತಿಳುವಳಿಕೆಯನ್ನು ಕಲಿಸಿದವು. ಈ ಕೃತಿಗಳು ಅನೇಕ ಭಾಷೆಗಳಲ್ಲಿ ಅನುವಾದಗೊಂಡು ಯೋಗಾಭ್ಯಾಸಿಗಳಿಗೆ ಮಾರ್ಗದರ್ಶಕವಾಗಿವೆ. ಇವಿಷ್ಟೇ ಅಲ್ಲದೇ “Light on Life” ಎಂಬ ಕೃತಿಯನ್ನು ಕೂಡಾ ಬರೆದಿದ್ದಾರೆ.
ಅಯ್ಯಂಗಾರರಿಗೆ ಸಂದ ಪ್ರಶಸ್ತಿ ಮತ್ತು ಗೌರವಗಳು:
ತಮ್ಮ ಅಪಾರ ಯೋಗ ಸಾಧನೆಗಾಗಿ ಹಲವಾರು ಪ್ರಶಸ್ತಿಗಳನ್ನು ಮತ್ತು ಗೌರವಗಳನ್ನು ಪಡೆದಿದ್ದಾರೆ. ಅವರ ಗೌರವಗಳು ಭಾರತೀಯ ಸರ್ಕಾರದಿಂದಲೂ ಮತ್ತು ಜಾಗತಿಕ ವೇದಿಕೆಗಳಲ್ಲಿ ಪ್ರಾಪ್ತವಾಗಿವೆ.
- ಅಯ್ಯಂಗಾರರಿಗೆ ಭಾರತೀಯ ಯೋಗದ ಪ್ರಸಾರಕ್ಕಾಗಿ ಭಾರತ ಸರಕಾರವು 1991 ರಲ್ಲಿ ಪದ್ಮಶ್ರೀ ಪ್ರಶಸ್ತಿ ನೀಡಿ ಗೌರವಿಸಿದೆ. ಇದು ಭಾರತದಲ್ಲಿನ ಶ್ರೇಷ್ಠ ಸಾಧಕರಿಗೆ ನೀಡುವ ನಾಲ್ಕನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾಗಿದೆ.
- ಯೋಗ ಕ್ಷೇತ್ರಕ್ಕೆ ನೀಡಿದ ಅತ್ಯುತ್ತಮ ಕೊಡುಗೆಗಾಗಿ 2002ರಲ್ಲಿ ಪದ್ಮಭೂಷಣ ಪ್ರಶಸ್ತಿಯನ್ನು ನೀಡಲಾಗಿದೆ. ಇದು ಭಾರತೀಯ ನಾಗರಿಕರ ಸಾಧನೆಗಳನ್ನು ಗೌರವಿಸುವ ಮೂರನೇ ಉನ್ನತ ನಾಗರಿಕ ಪ್ರಶಸ್ತಿ.
- ಅವರು ಮಾಡಿದ ಯೋಗದ ಪ್ರಚಾರಕ್ಕಾಗಿ ಮತ್ತು ಯೋಗವನ್ನು ಜಗತ್ತಿನ ಮೂಲಭೂತ ಭಾಗವನ್ನಾಗಿ ಮಾಡಿದ ಶ್ರೇಷ್ಠ ಸಾಧನೆಗಾಗಿ 2014ರಲ್ಲಿ ಪದ್ಮವಿಭೂಷಣ ಪ್ರಶಸ್ತಿಯನ್ನು ಕೊಟ್ಟು ಗೌರವಿಸಲಾಯಿತು. ಇದು ಭಾರತದಲ್ಲಿನ ಶ್ರೇಷ್ಠ ಸಾಧಕರಿಗೆ ನೀಡುವ ಎರಡನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾಗಿದೆ.
- ಟೈಮ್ ಮ್ಯಾಗಜಿನ್ 2004ರಲ್ಲಿ ಅವರನ್ನು “ಜಗತ್ತಿನ 100 ಪ್ರಭಾವಶಾಲಿ ವ್ಯಕ್ತಿಗಳಲ್ಲಿ ಒಬ್ಬರು” ಎಂದು ಘೋಷಿಸಿತ್ತು.
- 2009ರಲ್ಲಿ ಬ್ರಿಟನ್‌ನಲ್ಲಿ ಅವರನ್ನು “ವಿಶ್ವದ ಶ್ರೇಷ್ಠ ಯೋಗ ಗುರು” ಎಂಬ ಬಿರುದನ್ನು ನೀಡಿ ಗೌರವಿಸಲಾಯಿತು.
- ಯೋಗ ಕ್ಷೇತ್ರಕ್ಕೆ ಅವರು ಕೊಟ್ಟ ಅನನ್ಯ ಕೊಡುಗಳಿಗಾಗಿ, ಅವರಿಗೆ ಅನೇಕ ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅನೇಕ ಪ್ರಶಸ್ತಿಗಳು ಲಭಿಸಿವೆ.
ಕಡು ಬಡತನ, ಮತ್ತು ಅನಾರೋಗ್ಯದೊಂದಿಗೆ ಪ್ರಾರಂಭವಾದ ಅಯ್ಯಂಗಾರರ ಜೀವನದಲ್ಲಿ ಯಶಸ್ಸಿನ ಶಿಖರವನ್ನೂ ಏರಿದರು. ಅವರು ತಮ್ಮ ಜೀವನದ ಕೊನೆಯ ವರ್ಷಗಳಲ್ಲಿ, ವೃದ್ಧಾಪ್ಯದ ಜಟಿಲತೆಗಳನ್ನು ಎದುರಿಸಿದರು. 2014ರಲ್ಲಿ, ಅವರು ಅಸ್ವಸ್ಥರಾಗಿದ್ದು, ಹೃದಯ ಸಂಬಂಧಿ ಕಾಯಿಲೆಗಳಿಗೆ ತುತ್ತಾದರು. ಪರಿಣಾಮವಾಗಿ, ತಮ್ಮ ಯೋಗಾಭ್ಯಾಸವನ್ನು ಕಡಿಮೆ ಮಾಡಿದರು. 2014ರ ಆಗಸ್ಟ್‌ನಲ್ಲಿ, ಅಯ್ಯಂಗಾರರನ್ನು ಪುಣೆಯ ರೂಬಿ ಹಾಲ್ ಕ್ಲಿನಿಕ್‌ಗೆ ದಾಖಲಿಸಲಾಯಿತು. ಅವರು ಆಧುನಿಕ ವೈದ್ಯಕೀಯ ಸಾಧನಗಗಳನ್ನು ಬಳಸಲು ಇಚ್ಛಿಸಲಿಲ್ಲ. ಬದಲಾಗಿ, ತಮ್ಮ ಶಿಷ್ಯರು ಮತ್ತು ಕುಟುಂಬದವರೊಂದಿಗೆ ಆಧ್ಯಾತ್ಮಿಕ ತತ್ವಗಳನ್ನು ಹಂಚಿಕೊಳ್ಳುತ್ತಾ, ತಮ್ಮ ಜೀವನದ ಕೊನೆಯ ದಿನಗಳನ್ನು ಸಹಜವಾಗಿ ಕಳೆದರು. ತುಂಬಾ ಧೈರ್ಯದಿಂದ ಹಾಗೂ ಶಾಂತವಾಗಿ ಎದುರಿಸಿದರು. ಅವರಿಗೆ ತಮ್ಮ ಯೋಗ ಬೋಧನೆಯ ಮೂಲಕ ಅಮರವಾಗುವ ವಿಚಾರದಲ್ಲಿ ತೃಪ್ತಿ ಇತ್ತು. ಅರ್ಥಪೂರ್ಣ ಬದುಕನ್ನು ಬದುಕಿದ ಅಯ್ಯಂಗಾರರು 2014ರ ಆಗಸ್ಟ್ 20ರಂದು, ತಮ್ಮ 95ನೇ ವಯಸ್ಸಿನಲ್ಲಿ ಪುಣೆಯಲ್ಲಿ ನಿಧನರಾದರು.
ಬಿ.ಕೆ.ಎಸ್. ಅಯ್ಯಂಗಾರರು ಯೋಗವನ್ನು ಹೊಸ ಮಟ್ಟಕ್ಕೆ ಏರಿಸಿ, ಅದನ್ನು ಜೀವನದ ಮಹತ್ವದ ಭಾಗವನ್ನಾಗಿ ಪರಿವರ್ತಿಸಿದರು. ಅವರ ಶ್ರದ್ಧೆ, ಶಿಸ್ತು, ಮತ್ತು ಶ್ರೇಷ್ಠತೆಯ ಪ್ರತಿಬಿಂಬವು ಅವರು ಸ್ಥಾಪಿಸಿದ “ಅಯ್ಯಂಗಾರ್ ಯೋಗ”ದಲ್ಲಿ ಕಾಣುತ್ತದೆ. ಈ ಶೈಲಿ ಅನೇಕರನ್ನು ಆಕರ್ಷಿಸಿ, ಯೋಗವನ್ನು ಜೀವನದ ಭಾಗವನ್ನಾಗಿ ಮಾಡಿದೆ.