ಮಂಗಳೂರು: ಸೆಂಟ್ ಅಲೋಶಿಯಸ್ ಡೀಮ್ಡ್ ಯೂನಿವರ್ಸಿಟಿಯ ವಿದ್ಯಾರ್ಥಿನಿ ರೆಮೊನಾ ಎವೆಟ್ ಪೆರೇರಾ ಇವಳು ಐತಿಹಾಸಿಕ 170 ಗಂಟೆಗಳ ಭರತನಾಟ್ಯ ಮ್ಯಾರಥಾನ್ ನಲ್ಲಿ ಭಾಗವಹಿಸಿ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಸೇರಲು ಸಜ್ಜಾಗಿದ್ದಾರೆ. ಜುಲೈ 21 ರಂದು ಪ್ರಾರಂಭವಾದ ಈ ಮ್ಯಾರಥಾನ್ ಇಂದು, ಜುಲೈ 28ರಂದು ಮಧ್ಯಾಹ್ನ 1 ಗಂಟೆಗೆ ಸಂಪೂರ್ಣಗೊಳ್ಳಲಿದೆ.
ಪ್ರತಿಯೊಂದು ಮೂರು ಗಂಟೆಗಳ ನಂತರ 15 ನಿಮಿಷ ವಿಶ್ರಾಂತಿ ಮಾತ್ರ ಪಡೆಯುವ ರೆಮೊನಾ ಈಗಾಗಲೇ 125ಕ್ಕೂ ಹೆಚ್ಚು ಗಂಟೆಗಳ ನಿರಂತರ ನೃತ್ಯವನ್ನು ಪೂರ್ಣಗೊಳಿಸಿದ್ದಾರೆ. ಈ ನೃತ್ಯಯಾತ್ರೆ ಕೇವಲ ಶಾರೀರಿಕ ಶಕ್ತಿಯ ಪರೀಕ್ಷೆಯಲ್ಲ, ಇದು ಭಾರತೀಯ ಸಂಸ್ಕೃತಿಯ ಶಾಶ್ವತತೆಯ ಪ್ರತಿಬಿಂಬವೂ ಹೌದು.
ಪರಂಪರೆಯ ಶ್ರೇಷ್ಟತೆ, ಶ್ರದ್ಧೆ ಮತ್ತು ನೃತ್ಯದ ಆಸಕ್ತಿಯಿಂದ ತುಂಬಿದ ಈ ವಿದ್ಯಾರ್ಥಿನಿ, 3ನೇ ವರ್ಷದ ಬಿಎ ವಿದ್ಯಾರ್ಥಿನಿಯಾಗಿದ್ದು, ಮಕ್ಕಳ ರಾಷ್ಟ್ರೀಯ ಪ್ರಶಸ್ತಿ “ಪ್ರಧಾನ ಮಂತ್ರಿ ಬಾಲ ಪುರಸ್ಕಾರ್ – 2022” ಗಳಿಸಿರುತ್ತಾರೆ.
ಈ ಕಾರ್ಯಕ್ರಮಕ್ಕೆ ಗುಂಡೂರಾವ್, ಶಾಸಕ ವೇದವ್ಯಾಸ ಕಾಮತ್, ಸೇರಿದಂತೆ ಹಲವಾರು ಗಣ್ಯರು ಭೇಟಿ ನೀಡಿ ಅಭಿನಂದಿಸಿದ್ದಾರೆ.
