ಉಡುಪಿ: ಕೃಷ್ಣನಗರಿ ಉಡುಪಿಯ ಪ್ರಸಿದ್ಧ ಶ್ರೀಕೃಷ್ಣ ಮಠಕ್ಕೆ ಆಗಮಿಸುವ ಭಕ್ತರಿಗೆ ಮಠದ ಆಡಳಿತ ಮಂಡಳಿಯು ಈಗ ಹೊಸ ವಸ್ತ್ರಸಂಹಿತೆಯನ್ನು (Dress Code) ಕಡ್ಡಾಯಗೊಳಿಸಿದೆ. ಪರ್ಯಾಯ ಶೀರೂರು ಮಠದ ನಿರ್ದೇಶನದಂತೆ ಜನವರಿ 19ರಿಂದಲೇ ಈ ನಿಯಮ ಜಾರಿಗೆ ಬಂದಿದ್ದು, ಮಠದ ಪಾವಿತ್ರ್ಯತೆಯನ್ನು ಕಾಪಾಡುವ ನಿಟ್ಟಿನಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಪುರುಷರು ಮತ್ತು ಮಹಿಳೆಯರಿಗೆ ಹೊಸ ನಿಯಮಗಳೇನು? ಈ ಹಿಂದೆ ಶ್ರೀಕೃಷ್ಣ ಮಠದಲ್ಲಿ ಬೆಳಿಗ್ಗೆ 11 ಗಂಟೆಯೊಳಗೆ ನಡೆಯುವ ಮಹಾಪೂಜೆಯ ಸಮಯದಲ್ಲಿ ಮಾತ್ರ ಪುರುಷರು ಮೇಲಂಗಿ (ಶರ್ಟ್) ತೆಗೆದು ದರ್ಶನ ಪಡೆಯಬೇಕೆಂಬ ನಿಯಮವಿತ್ತು. ಆದರೆ ಈಗಿನ ಹೊಸ ಮಾರ್ಗಸೂಚಿಯ ಪ್ರಕಾರ:
- ಪುರುಷರು: ಮಠದ ಒಳಗೆ ಪ್ರವೇಶಿಸುವಾಗ ದಿನದ ಯಾವುದೇ ಸಮಯದಲ್ಲಾದರೂ ಕಡ್ಡಾಯವಾಗಿ ಶರ್ಟ್ ಅಥವಾ ಬನಿಯನ್ ಧರಿಸುವಂತಿಲ್ಲ. ಕೇವಲ ಪಂಚೆ ಅಥವಾ ಶಲ್ಯವನ್ನು ಮಾತ್ರ ಧರಿಸಿ ದರ್ಶನ ಪಡೆಯಬೇಕು.
- ಮಹಿಳೆಯರು: ಮಹಿಳೆಯರು ಕಡ್ಡಾಯವಾಗಿ ಸಾಂಪ್ರದಾಯಿಕ ಉಡುಪುಗಳಾದ ಸೀರೆ ಅಥವಾ ಚೂಡಿದಾರ್ (ದುಪಟ್ಟಾ ಇರಬೇಕು) ಧರಿಸಿರಬೇಕು. ಅರೆಬರೆ ಅಥವಾ ಆಧುನಿಕ ಫ್ಯಾಷನ್ ಉಡುಪುಗಳಿಗೆ ಅವಕಾಶವಿಲ್ಲ.
ಪರ್ಯಾಯ ಶೀರೂರು ಮಠದ ಮಹತ್ವದ ನಿರ್ಧಾರ ಪ್ರಸ್ತುತ ಪರ್ಯಾಯ ಪೀಠವನ್ನಲಂಕರಿಸಿರುವ ಶೀರೂರು ಮಠದ ಶ್ರೀ ವೇದವರ್ಧನ ತೀರ್ಥ ಶ್ರೀಪಾದರು ಈ ಹೊಸ ನಿಯಮವನ್ನು ಜಾರಿಗೆ ತಂದಿದ್ದಾರೆ. ಮಠಕ್ಕೆ ಬರುವ ಭಕ್ತರು ಪೂಜ್ಯ ಭಾವನೆಯಿಂದ ಹಾಗೂ ಸಾಂಪ್ರದಾಯಿಕ ಶಿಸ್ತಿನಿಂದ ಇರಬೇಕು ಎಂಬುದು ಈ ಆದೇಶದ ಮುಖ್ಯ ಉದ್ದೇಶವಾಗಿದೆ.
”ದೇವಾಲಯದ ಸಂಪ್ರದಾಯ ಮತ್ತು ಪಾವಿತ್ರ್ಯತೆಯನ್ನು ಉಳಿಸಿಕೊಳ್ಳಲು ಭಕ್ತರು ಸಹಕರಿಸಬೇಕು. ಈ ವಸ್ತ್ರಸಂಹಿತೆಯು ಕೇವಲ ಒಂದು ನಿರ್ದಿಷ್ಟ ಸಮಯಕ್ಕೆ ಸೀಮಿತವಾಗದೆ, ಇಡೀ ದಿನ ಅನ್ವಯವಾಗಲಿದೆ,” ಎಂದು ಮಠದ ಮೂಲಗಳು ತಿಳಿಸಿವೆ.