ಭಾರತದ ಸಹಕಾರ ಚಳವಳಿಗೆ ವಿಶ್ವದ ವೇದಿಕೆಯಲ್ಲಿ ಮತ್ತೊಂದು ಗೌರವದ ಕ್ಷಣ. ಗುಜರಾತ್ ಕೋ-ಆಪರೇಟಿವ್ ಮಿಲ್ಕ್ ಮಾರ್ಕೆಟಿಂಗ್ ಫೆಡರೇಶನ್ (Amul) ಹಾಗೂ ಇಂಡಿಯನ್ ಫರ್ಟಿಲೈಸರ್ ಕೋ-ಆಪರೇಟಿವ್ ಲಿಮಿಟೆಡ್ (IFFCO) ಸಂಸ್ಥೆಗಳು ICA ವರ್ಲ್ಡ್ ಕೋಆಪರೇಟಿವ್ ಮಾನಿಟರ್ 2025 ಪಟ್ಟಿಯಲ್ಲಿ ವಿಶ್ವದ ಅಗ್ರ ಸಹಕಾರ ಸಂಸ್ಥೆಗಳಾಗಿ ಸ್ಥಾನ ಪಡೆದಿವೆ.
ಕತಾರ್‌ನ ದೋಹಾದಲ್ಲಿ ನಡೆದ ICA CM50 ಕಾನ್ಫರೆನ್ಸ್ ನಲ್ಲಿ ಈ ಘೋಷಣೆ ಅಧಿಕೃತವಾಗಿ ಮಾಡಲಾಯಿತು. ಇದು ಭಾರತದ ಸಹಕಾರ ಮಾದರಿಯ ಶಕ್ತಿಯನ್ನು, ಗ್ರಾಮೀಣ ಆರ್ಥಿಕತೆಯ ಬೆಂಬಲವನ್ನು ಹಾಗೂ ರೈತರ ಒಕ್ಕೂಟದ ಯಶಸ್ಸನ್ನು ವಿಶ್ವ ಮಟ್ಟದಲ್ಲಿ ತೋರಿಸಿದ ಮಹತ್ವದ ಕ್ಷಣವಾಗಿದೆ.
ಅಮುಲ್ ಸಂಸ್ಥೆಯು ರೈತರಿಂದ ನಿರ್ಮಿತವಾದ ಹಾಲು ಉತ್ಪಾದನಾ ಜಾಲದ ಮೂಲಕ ಲಕ್ಷಾಂತರ ಕುಟುಂಬಗಳಿಗೆ ಆರ್ಥಿಕ ಸ್ವಾವಲಂಬನೆ ನೀಡಿದೆ. ಈ ಸಹಕಾರ ಮಾದರಿ ಭಾರತದಲ್ಲಿ ಆಹಾರ ಭದ್ರತೆ ಹಾಗೂ ಗ್ರಾಮೀಣ ಅಭಿವೃದ್ಧಿಗೆ ನಿದರ್ಶನವಾಗಿದೆ.
ಇದೇ ರೀತಿಯಲ್ಲಿ, ಇಫ್ಕೊ(IFFCO) ಸಂಸ್ಥೆಯು ರೈತರ ಶಕ್ತೀಕರಣ, ಹಸಿರು ತಂತ್ರಜ್ಞಾನ, ಮತ್ತು ಪರಿಸರ ಸ್ನೇಹಿ ರಾಸಾಯನಿಕ ಉತ್ಪಾದನೆಗಳಲ್ಲಿ ವಿಶಿಷ್ಟ ಸ್ಥಾನ ಗಳಿಸಿದೆ. ಲಾಭದ ಒಂದು ಭಾಗವನ್ನು ಸಾಮಾಜಿಕ ಕಲ್ಯಾಣ ಹಾಗೂ ಹೊಸ ತಂತ್ರಜ್ಞಾನ ಅಭಿವೃದ್ಧಿಗೆ ಹೂಡಿಕೆ ಮಾಡುವ ಮೂಲಕ ಇಫ್ಕೊ ಸಹಕಾರ ತತ್ವದ ಶ್ರೇಷ್ಠ ಮಾದರಿಯಾಗಿದೆ.
ಈ ಸಾಧನೆಯು ಭಾರತದ ಸಹಕಾರ ಕ್ಷೇತ್ರದ ಮೈಲುಗಲ್ಲಾಗಿದ್ದು, ವಿಶ್ವದ ಸಹಕಾರ ಚಳವಳಿಯಲ್ಲಿಯೂ ಹೊಸ ದಾಖಲೆ ನಿರ್ಮಿಸಿದೆ.
