ಕಠ್ಮಂಡು, ಸೆಪ್ಟೆಂಬರ್ 10: ನೇಪಾಳ ರಾಜಧಾನಿ ಕಠ್ಮಂಡುವಿನ ಬೀದಿಗಳು ಬುಧವಾರ ಸೈನಿಕರ ನಿಯಂತ್ರಣಕ್ಕೆ ಒಳಗಾದವು. ಸಶಸ್ತ್ರ ಪಡೆಗಳು ಜನರಿಗೆ ಮನೆಗಳಿಂದ ಹೊರಬರದಂತೆ ಎಚ್ಚರಿಕೆ ನೀಡುತ್ತಾ, ಪ್ರಮುಖ ಪ್ರದೇಶಗಳಲ್ಲಿ ಕಾವಲು ನಿಂತಿವೆ. ಕಳೆದೆರಡು ದಿನಗಳಿಂದ ಹಿಂಸಾಚಾರ ಮತ್ತು ಅಶಾಂತಿಯ ವಾತಾವರಣ ಆವರಿಸಿದ್ದ ನಗರದಲ್ಲಿ ಈಗ ಕ್ರಮೇಣ ನಿಯಂತ್ರಣ ವಾಪಸ್ಸಾಗುತ್ತಿರುವಂತೆ ಕಂಡುಬರುತ್ತಿದೆ.
ಮಂಗಳವಾರ ರಾತ್ರಿ ನೇಪಾಳ ಸೇನೆ ಪ್ರಕಟಣೆ ಹೊರಡಿಸಿ, ಕಾನೂನು-ಸುವ್ಯವಸ್ಥೆ ಕಾಪಾಡಲು ಬದ್ಧವಾಗಿರುವುದಾಗಿ ತಿಳಿಸಿತು. ಪೊಲೀಸರ ನಿಯಂತ್ರಣ ವಿಫಲವಾದ ಹಿನ್ನೆಲೆಯಲ್ಲಿ ಸೇನೆಯನ್ನು ನಿಯೋಜಿಸಲಾಯಿತು. ಸೈನಿಕರು ವಾಹನ ಹಾಗೂ ನಾಗರಿಕರನ್ನು ತಪಾಸಣೆ ನಡೆಸಿ, ಕರ್ಫ್ಯೂ ಜಾರಿಯಲ್ಲಿದೆ ಎಂದು ಎಚ್ಚರಿಸಿದ್ದಾರೆ. ಲೂಟಿ ಪ್ರಕರಣದಲ್ಲಿ 21 ಮಂದಿ ಶಂಕಿತರನ್ನು ಬಂಧಿಸಲಾಗಿದೆ.
ಪ್ರತಿಭಟನೆಗಳು ಮಂಗಳವಾರ ತೀವ್ರ ರೂಪ ಪಡೆದು, ಸಾವಿರಾರು ಮಂದಿ ಸರ್ಕಾರದ ಕಟ್ಟಡಗಳು, ರಾಜಕಾರಣಿಗಳ ಮನೆಗಳಿಗೆ ಬೆಂಕಿ ಹಚ್ಚಿ ದಾಳಿ ನಡೆಸಿದರು. ತೀವ್ರ ಟೀಕೆಗೆ ಗುರಿಯಾದ ಪ್ರಧಾನಿ ಕೆ.ಪಿ. ಶರ್ಮಾ ಓಲಿ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ಆದರೆ ಈ ನಿರ್ಧಾರವು ಪ್ರತಿಭಟನೆಗಳನ್ನು ನಿಯಂತ್ರಿಸಲು ಸಹಾಯವಾಗಲಿಲ್ಲ. ಸೇನಾ ಹೆಲಿಕಾಪ್ಟರ್‌ಗಳ ಮೂಲಕ ಕೆಲ ಸಚಿವರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲಾಯಿತು.
🔸 ಸಾಮಾಜಿಕ ಜಾಲತಾಣ ನಿಷೇಧ ಪ್ರತಿಭಟನೆಗೆ ನಾಂದಿ: ಸೋಮವಾರ ಸರ್ಕಾರ ಹಲವಾರು ಸಾಮಾಜಿಕ ಜಾಲತಾಣಗಳನ್ನು ತಾತ್ಕಾಲಿಕವಾಗಿ ನಿಷೇಧಿಸಿದ ಹಿನ್ನೆಲೆಯಲ್ಲಿ ಯುವಕರು ಬೀದಿಗಿಳಿದು ಪ್ರತಿಭಟಿಸಿದ್ದರು. ಆ ವೇಳೆ ಪೊಲೀಸರು ಗುಂಡು ಹಾರಿಸಿದ ಪರಿಣಾಮ 19 ಮಂದಿ ಜೀವ ಕಳೆದುಕೊಂಡಿದ್ದಾರೆ. ಮಂಗಳವಾರ ಸರ್ಕಾರ ನಿಷೇಧವನ್ನು ಹಿಂತೆಗೆದುಕೊಂಡರೂ, ಪ್ರತಿಭಟನೆ ಶಮನಗೊಳ್ಳದೆ ಜನರ ಕೋಪ ಮತ್ತಷ್ಟು ಭುಗಿಲೆದ್ದಿತ್ತು.