ಭಾರತೀಯ ಮೂಲದ ಹೆಮ್ಮೆಯ ಗಗನಯಾತ್ರಿ ಸುನಿತಾ ವಿಲಿಯಮ್ಸ್ ಅವರು ತಮ್ಮ 27 ವರ್ಷಗಳ ಸುದೀರ್ಘ ಮತ್ತು ಯಶಸ್ವಿ ವೃತ್ತಿಜೀವನಕ್ಕೆ ವಿದಾಯ ಹೇಳಿದ್ದಾರೆ. ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ (NASA) ಜನವರಿ 20 ರಂದು ಅವರ ನಿವೃತ್ತಿಯನ್ನು ಅಧಿಕೃತವಾಗಿ ಪ್ರಕಟಿಸಿದೆ. 608 ದಿನಗಳ ಕಾಲ ಬಾಹ್ಯಾಕಾಶದಲ್ಲಿ ಕಳೆದ ಸುನಿತಾ ಅವರ ನಿವೃತ್ತಿಯು ಡಿಸೆಂಬರ್ 27, 2025 ರಿಂದಲೇ ಜಾರಿಗೆ ಬಂದಿದೆ ಎಂದು ಸಂಸ್ಥೆ ತಿಳಿಸಿದೆ.
ದೆಹಲಿಯಲ್ಲಿ ಸುನಿತಾ ವಿಲಿಯಮ್ಸ್: “ಬಾಹ್ಯಾಕಾಶವೇ ನನ್ನ ಅಚ್ಚುಮೆಚ್ಚಿನ ತಾಣ” ಸದ್ಯ ಭಾರತ ಪ್ರವಾಸದಲ್ಲಿರುವ ಸುನಿತಾ ಅವರು ಮಂಗಳವಾರ ದೆಹಲಿಯ ಅಮೆರಿಕನ್ ಸೆಂಟರ್ನಲ್ಲಿ ಆಯೋಜಿಸಲಾಗಿದ್ದ ಸಂವಾದದಲ್ಲಿ ಭಾಗವಹಿಸಿದ್ದರು. “ಬಾಹ್ಯಾಕಾಶವೇ ನನಗೆ ಅತ್ಯಂತ ಪ್ರಿಯವಾದ ಜಾಗ. ನಾಸಾದಲ್ಲಿ ಕೆಲಸ ಮಾಡಿದ್ದು ಒಂದು ದೊಡ್ಡ ಗೌರವ,” ಎಂದು ಅವರು ಭಾವನಾತ್ಮಕವಾಗಿ ನುಡಿದರು. ಇದೇ ವೇಳೆ ಅವರು ಕಲ್ಪನಾ ಚಾವ್ಲಾ ಅವರ ತಾಯಿಯನ್ನು ಭೇಟಿ ಮಾಡಿ ಅಪ್ಪಿಕೊಂಡ ಕ್ಷಣ ನೆರೆದಿದ್ದವರ ಕಣ್ಣಾಲಿಗಳನ್ನು ತೇವಗೊಳಿಸಿತು.
ಸುನಿತಾ ಅವರ ವೃತ್ತಿಜೀವನದ ಮೈಲಿಗಲ್ಲುಗಳು:
- ದಾಖಲೆಗಳ ಸರದಾರೆ: ಒಟ್ಟು 608 ದಿನಗಳನ್ನು ಬಾಹ್ಯಾಕಾಶದಲ್ಲಿ ಕಳೆದ ಇವರು, ನಾಸಾ ಇತಿಹಾಸದಲ್ಲಿ ಅತಿ ಹೆಚ್ಚು ಸಮಯ ಕಕ್ಷೆಯಲ್ಲಿದ್ದ ಎರಡನೇ ಗಗನಯಾತ್ರಿಯಾಗಿದ್ದಾರೆ.
- ಸ್ಪೇಸ್ವಾಕ್ ಸಾಧನೆ: ಒಟ್ಟು 9 ಬಾರಿ ಸ್ಪೇಸ್ವಾಕ್ (62 ಗಂಟೆ 6 ನಿಮಿಷ) ನಡೆಸಿದ ಇವರು, ಮಹಿಳಾ ವಿಭಾಗದಲ್ಲಿ ಅತಿ ಹೆಚ್ಚು ಸಮಯ ಬಾಹ್ಯಾಕಾಶ ನಡಿಗೆ ಮಾಡಿದ ದಾಖಲೆ ಹೊಂದಿದ್ದಾರೆ.
- ಬಾಹ್ಯಾಕಾಶ ಮ್ಯಾರಾಥಾನ್: ಕಕ್ಷೆಯಲ್ಲಿದ್ದಾಗಲೇ ಮ್ಯಾರಾಥಾನ್ ಪೂರ್ಣಗೊಳಿಸಿದ ವಿಶ್ವದ ಮೊದಲ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಇವರು ಪಾತ್ರರಾಗಿದ್ದಾರೆ.
- ಅಂತಿಮ ಮಿಷನ್: 2024ರ ಜೂನ್ನಲ್ಲಿ ಕೇವಲ 8 ದಿನಗಳ ಮಿಷನ್ಗಾಗಿ ತೆರಳಿದ್ದ ಅವರು, ತಾಂತ್ರಿಕ ದೋಷದಿಂದಾಗಿ 9 ತಿಂಗಳ ಕಾಲ ಅಲ್ಲೇ ಉಳಿದು, ಮಾರ್ಚ್ 2025 ರಲ್ಲಿ ಭೂಮಿಗೆ ಮರಳಿದ್ದರು.
ನಾಸಾದ ಆಡಳಿತಾಧಿಕಾರಿ ಜೇರೆಡ್ ಐಸಾಕ್ಮನ್ ಅವರು ಸುನಿತಾ ಅವರ ಸೇವೆಯನ್ನು ಶ್ಲಾಘಿಸಿದ್ದು, “ಸುನಿ ಅವರು ಬಾಹ್ಯಾಕಾಶ ಅನ್ವೇಷಣೆಯಲ್ಲಿ ಹೊಸ ಹಾದಿ ನಿರ್ಮಿಸಿದ್ದಾರೆ. ಅವರು ಹಾಕಿಕೊಟ್ಟ ಅಡಿಪಾಯವು ಭವಿಷ್ಯದ ಚಂದ್ರ ಮತ್ತು ಮಂಗಳ ಗ್ರಹದ ಮಿಷನ್ಗಳಿಗೆ ಸ್ಫೂರ್ತಿಯಾಗಲಿದೆ,” ಎಂದು ಹೇಳಿದ್ದಾರೆ.