ಭಾರತದ ಪ್ರಮುಖ ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ಹಬ್ಬಗಳಲ್ಲಿ ಒಂದಾದ ದೀಪಾವಳಿಯನ್ನು ವಿಶ್ವಸಂಸ್ಥೆಯ ಶೈಕ್ಷಣಿಕ, ವೈಜ್ಞಾನಿಕ ಮತ್ತು ಸಾಂಸ್ಕೃತಿಕ ಸಂಸ್ಥೆಯ (UNESCO) ಮಾನವಕುಲದ ಅಮೂರ್ತ ಸಾಂಸ್ಕೃತಿಕ ಪರಂಪರೆಯ (Intangible Cultural Heritage of Humanity) ಪಟ್ಟಿಗೆ ಸೇರಿಸಲಾಗಿದೆ. ಇದು ದೇಶಕ್ಕೆ ದೊರೆತ ಮತ್ತೊಂದು ಮಹತ್ವದ ಅಂತರರಾಷ್ಟ್ರೀಯ ಗೌರವವಾಗಿದೆ.
ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಸಚಿವ ಗಜೇಂದ್ರ ಸಿಂಗ್ ಶೇಖಾವತ್ ಅವರು ಈ ಸುದ್ದಿಯನ್ನು ಘೋಷಿಸಿ, “ಇದು ಪ್ರತಿಯೊಬ್ಬ ಭಾರತೀಯರಿಗೂ ಒಂದು ಭಾವುಕ ಕ್ಷಣ” ಎಂದು ಬಣ್ಣಿಸಿದರು. “ದೀಪಾವಳಿಯನ್ನು ಕೇವಲ ಆಚರಿಸುವುದಿಲ್ಲ, ಅದನ್ನು ತಲೆಮಾರುಗಳಿಂದ ಅನುಭವಿಸಲಾಗುತ್ತದೆ, ಜೀವಿಸಲಾಗುತ್ತದೆ ಮತ್ತು ಮೈಗೂಡಿಸಿಕೊಳ್ಳಲಾಗುತ್ತದೆ” ಎಂದು ಅವರು ಹೇಳಿದರು.
ಸಚಿವರು ಈ ಮಾನ್ಯತೆಯನ್ನು ಕೇವಲ ಗೌರವವಲ್ಲ, ಬದಲಿಗೆ ದೀಪಾವಳಿಯನ್ನು ‘ಜೀವಂತ ಪರಂಪರೆ’ಯಾಗಿ ಉಳಿಸಿಕೊಳ್ಳಲು ಇರುವ ಜವಾಬ್ದಾರಿ ಎಂದು ಒತ್ತಿ ಹೇಳಿದರು. ಈ ಹಬ್ಬದ ಜೀವಂತಿಕೆ ಮತ್ತು ಜನರ ಪಾತ್ರವನ್ನು ಎತ್ತಿ ಹಿಡಿದ ಅವರು, ಕೋಟ್ಯಂತರ ಜನರ ಕೊಡುಗೆಯಿಂದಲೇ ದೀಪಾವಳಿ ಸದಾಕಾಲ ಉಳಿದಿದೆ ಎಂದು ಹೇಳಿದರು.