ಗುವಾಹಟಿ: ಐಸಿಸಿ ಮಹಿಳಾ ವಿಶ್ವಕಪ್ ಕ್ರಿಕೆಟ್ 2025ರ ಉದ್ಘಾಟನಾ ಪಂದ್ಯದಲ್ಲಿ ಭಾರತವು ಶ್ರೀಲಂಕಾವನ್ನು 59 ರನ್‌ಗಳಿಂದ ಮಣಿಸಿದೆ. ಮಳೆ ಅಡ್ಡಿಯಾದ ಕಾರಣ ಡಕ್ವರ್ತ್-ಲೂಯಿಸ್-ಸ್ಟರ್ನ್ (DLS) ವಿಧಾನ ಅನುಸರಿಸಲಾಯಿತು.
ಶ್ರೀಲಂಕಾ ಟಾಸ್‌ ಗೆದ್ದು ಮೊದಲು ಬೌಲಿಂಗ್ ಆಯ್ದುಕೊಂಡಿತು. ಭಾರತವು 47 ಓವರ್‌ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 269 ರನ್ ಗಳಿಸಿತು. ಭಾರತದ ಪರ ಅಂಜಮೋತ್ ಕೌರ್ 57 ರನ್‌ಗಳೊಂದಿಗೆ ಅಗ್ರ ಸ್ಕೋರರ್ ಆಗಿ ಹೊರಹೊಮ್ಮಿದರು. ಶ್ರೀಲಂಕಾದ ಇನೋಕಾ ರಣವೀರ 4 ವಿಕೆಟ್‌ಗಳನ್ನು ಕಿತ್ತರು.
ಮಳೆ ಕಾರಣದಿಂದ ಭಾರತಕ್ಕೆ ಅಂತಿಮ ಅಂಕೆ 270 ಆಗಿ ಪರಿಷ್ಕೃತವಾಗಿದ್ದು, ಶ್ರೀಲಂಕೆಗೆ 271ರ ಗುರಿ ನೀಡಲಾಯಿತು. ಗುರಿ ಬೆನ್ನಟ್ಟಿದ ಶ್ರೀಲಂಕಾ 45.4 ಓವರ್‌ಗಳಲ್ಲಿ 211 ರನ್‌ಗಳಿಗೆ ಆಲೌಟ್‌ ಆಯಿತು.
ಭಾರತದ ದೀಪ್ತಿ ಶರ್ಮಾ ಪಂದ್ಯಶ್ರೇಷ್ಟೆ (ಪ್ಲೇಯರ್ ಆಫ್ ದ ಮ್ಯಾಚ್) ಎನಿಸಿದರು. ಹರ್ಮನ್‌ಪ್ರೀತ್ ಕೌರ್ ನಾಯಕತ್ವದ ಭಾರತೀಯ ತಂಡವು ಮಹಿಳಾ ಕ್ರಿಕೆಟ್‌ನಲ್ಲಿ 47 ವರ್ಷಗಳಿಂದ ಕಾದಿರುವ ಮೊದಲ ಐಸಿಸಿ ಟ್ರೋಫಿ ಗೆಲುವಿನತ್ತ ದೃಢವಾಗಿ ಹೆಜ್ಜೆ ಇಟ್ಟಿದೆ.
ಮಹಿಳಾ ವಿಶ್ವಕಪ್ 2025 ಇದು 13ನೇ ಆವೃತ್ತಿಯಾಗಿದ್ದು, ಭಾರತ, ಶ್ರೀಲಂಕಾ, ಆಸ್ಟ್ರೇಲಿಯಾ, ಇಂಗ್ಲೆಂಡ್, ನ್ಯೂಜಿಲೆಂಡ್, ದಕ್ಷಿಣ ಆಫ್ರಿಕಾ, ಬಾಂಗ್ಲಾದೇಶ ಹಾಗೂ ಪಾಕಿಸ್ತಾನ – ಒಟ್ಟು 8 ತಂಡಗಳು ಪಾಲ್ಗೊಂಡಿವೆ. 28 ಲೀಗ್‌ ಪಂದ್ಯಗಳು ರೌಂಡ್-ರಾಬಿನ್‌ ಪದ್ದತಿಯಲ್ಲಿ ಭಾರತದಲ್ಲಿನ ನಾಲ್ಕು ಮೈದಾನಗಳು ಹಾಗೂ ಕೊಲಂಬೊ ಮೈದಾನದಲ್ಲಿ ನಡೆಯಲಿದೆ.
ಭಾರತ–ಪಾಕಿಸ್ತಾನ ನಡುವಿನ ಬಹು ನಿರೀಕ್ಷಿತ ಪಂದ್ಯ ಭಾನುವಾರ ಕೊಲಂಬೊನಲ್ಲಿ ಜರುಗಲಿದೆ.