ಇತ್ತೀಚೆಗೆ ಪುಣೆಯ ಮಾಂಛರ್ ಪ್ರದೇಶದಲ್ಲಿ ಮಸೀದಿ ಅಡಿಯಲ್ಲಿ ಸುರಂಗದಂತಹ ಮರದ ರಚನೆ ಪತ್ತೆಯಾದ ಹಿನ್ನೆಲೆಯಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದೆ. ಗುರುವಾರ ಸಂಜೆ ಪುನರ್‌ನಿರ್ಮಾಣ ಕಾಮಗಾರಿ ವೇಳೆ ದರ್ಗಾ ಗೋಡೆಯ ಒಂದು ಭಾಗ ಕುಸಿದ ನಂತರ ಈ ರಹಸ್ಯಮಯ ಸುರಂಗ ಬೆಳಕಿಗೆ ಬಂದಿದೆ.
ಈ ಘಟನೆ ಬಳಿಕ ಹಿಂದೂ ಸಂಘಟನೆಗಳು ಅಲ್ಲಿ ದೇವಸ್ಥಾನ ಇರಬಹುದೆಂದು ಶಂಕೆ ವ್ಯಕ್ತಪಡಿಸಿ ತನಿಖೆ ನಡೆಸುವಂತೆ ಆಗ್ರಹಿಸಿವೆ. ಇನ್ನೊಂದೆಡೆ, ಮುಸ್ಲಿಂ ಸಂಘಟನೆಗಳು ಈ ಘಟನೆಗೆ ಆಕ್ರೋಶ ವ್ಯಕ್ತಪಡಿಸಿ, ಇದೊಂದು ದುರಂತಘಟನೆ ಎಂದಿವೆ.
ಸಮುದಾಯಗಳ ನಡುವೆ ಉಂಟಾದ ವಿವಾದದಿಂದ ಸ್ಥಳದಲ್ಲಿ ಉದ್ವಿಗ್ನತೆ ಹೆಚ್ಚಳ ಕಂಡುಬಂದಿದ್ದು, ಪೊಲೀಸರ ಭಾರೀ ಪಡೆ ನಿಯೋಜಿಸಲಾಗಿದೆ. ಪ್ರವೇಶಕ್ಕೆ ನಿರ್ಬಂಧ ಹೇರಲಾಗಿದ್ದು, ಸಿಸಿಟಿವಿ ಕ್ಯಾಮೆರಾ ಅಳವಡಿಕೆ ಸೇರಿದಂತೆ ಕಟ್ಟುನಿಟ್ಟಿನ ಭದ್ರತಾ ಕ್ರಮ ಕೈಗೊಳ್ಳಲಾಗಿದೆ.
ಅಧಿಕಾರಿಗಳು ಈ ಪ್ರಕರಣವನ್ನು ಸಂಬಂಧಿತ ಇಲಾಖೆಗೆ ಹಸ್ತಾಂತರಿಸಿರುವುದಾಗಿ ತಿಳಿಸಿದ್ದು, ತನಿಖೆ ನಡೆಯುತ್ತಿದೆ. ಅಧಿಕಾರಿಗಳು ಸಾರ್ವಜನಿಕರಿಗೆ ಶಾಂತಿ ಕಾಪಾಡುವಂತೆ ಮನವಿ ಮಾಡಿದ್ದಾರೆ.