ನವದೆಹಲಿ, ಜುಲೈ 11: ದಿಲ್ಲಿ-ಎನ್‌ಸಿಆರ್‌ನಲ್ಲಿ ಶುಕ್ರವಾರ ಸಂಜೆ 3.7 ತೀವ್ರತೆಯ ಭೂಕಂಪದ ಅನುಭವವಾಗಿದೆ. ರಾಷ್ಟ್ರೀಯ ಭೂಕಂಪ ವಿಜ್ಞಾನ ಕೇಂದ್ರದ (NCS) ಪ್ರಕಾರ, ಈ ಭೂಕಂಪನದ ಕೇಂದ್ರಬಿಂದು ಹರಿಯಾಣದ ಝರ್ಜರ್ ಎಂದು ದಾಖಲಾಗಿದೆ.
“ಭೂಕಂಪ: ತೀವ್ರತೆ 3.7, ದಿನಾಂಕ: 11/07/2025, ಸಮಯ: 19:49:43 IST, ಸ್ಥಳ: ಝರ್ಜರ್, ಹರಿಯಾಣ,” ಎಂದು NCS ಟ್ವಿಟರ್‌ನಲ್ಲಿ ತಿಳಿಸಿದೆ.
ಈ ಹಿಂದೆ, ಗುರುವಾರವೂ ಇದೇ ಝರ್ಜರ್ ಪ್ರದೇಶದಲ್ಲಿ 4.4 ತೀವ್ರತೆಯ ಭೂಕಂಪ ಸಂಭವಿಸಿತ್ತು. ಈ ಮೂಲಕ ಎರಡು ದಿನಗಳಲ್ಲಿ ಇದೇ ಪ್ರದೇಶದಲ್ಲಿ ಎರಡನೇ ಭೂಕಂಪವಾಗಿದೆ.
ಸ್ಥಳೀಯ ನಿವಾಸಿಗಳ ಪ್ರಕಾರ, ಭೂಕಂಪದ ಅನುಭವದಿಂದ ಜನರಲ್ಲಿ ಭಯ ಮತ್ತು ಆತಂಕ ಉಂಟಾಯಿತು. “ಇಂದು ಮತ್ತೆ ಕಂಪನ ಅನುಭವವಾಯಿತು. ದೇವರು ಕಾಪಾಡಲಿ ಎಂದು ಪ್ರಾರ್ಥಿಸುತ್ತೇವೆ,” ಎಂದು ಸ್ಥಳೀಯರು ತಿಳಿಸಿದ್ದಾರೆ.
ಈ ವರ್ಷದ ಆರಂಭದಲ್ಲೂ, ಫೆಬ್ರವರಿ 17 ರಂದು ಬೆಳಗ್ಗೆ 5.36 ಗಂಟೆಗೆ ದಿಲ್ಲಿ-ಎನ್‌ಸಿಆರ್‌ನಲ್ಲಿ 4.0 ತೀವ್ರತೆಯ ಭೂಕಂಪ ಸಂಭವಿಸಿತ್ತು. ಕೇಂದ್ರಬಿಂದು ನವದೆಹಲಿಯಿಂದ 9 ಕಿಮೀ ದೂರದಲ್ಲಿತ್ತು.